「篩選」、「收窄民主派參選空間」、「政治審查」等等，近日關於中央完善選舉制度嘅「決定」，反對派不斷表達佢哋嘅憂慮，甚至可以話係抹黑。關於將來對於立法會等參選人進行審查嘅資格審查委員會，係咪會有「政治審查」？如果大家問囍雨，囍雨嘅答案好簡單，就係審查委員一定會用政治角度去審查，呢個係無可避免；舉個例，如果有人鼓吹「港獨」，呢個既係法律亦係政治問題，負責審查嘅委員可以迴避呢個政治問題咩？如果唔理會政治問題，資格審查委員會嘅功能又喺邊度？

政治問題多籮籮

有啲嘢，係必須正視嘅政治問題，除咗上述嘅「港獨」問題，如果有政客叫外國制裁中央同香港官員，俾佢哋參選、當選，咁議會咪等「攬炒」？又或者，如果有政客未正式參選就已經講到明會以「無差別」方式否決議案以脅逼政府推行不符《基本法》嘅政改方案，又點可能俾佢哋選？所以，關於將來嘅資格審查委員會，係必須睇政治，以確保「愛國者治港」原則得到落實，確保政府、議會運作順暢。

但係，囍雨要指出，從政治角度睇政客嘅參選資格，唔代表反對派嘅空間會「收窄」，重點只在於，佢哋有無踰越紅線；上述提到嘅言行，絕對不可接受，但如果有反對派政客只係正常地議事，對唔同嘅社會政策提出質疑，甚至經考慮、審議同辯論後要就某啲政府法案提出反對，咁相信係無問題嘅。

加入第五界別 各界均衡參與

提到中央關於完善香港選舉制度嘅「決定」，除咗關於立法會選舉同埋資格審查委員會，唔少人都關心選舉委員會由1,200人增加至1,500人，將會加入「香港特別行政區全國人大代表、香港特別行政區全國政協委員和有關全國性團體香港成員的代表界」嘅第五界別，囍雨認為，一個社會包容唔同年齡、階層、行業以至專業等人士，依家選舉委員會進一步擴闊，其實係令到更多社會人士能夠加入選舉委員會，令其參與更均衡。將來嘅選委會，相信一定會更好地平衡各方利益，為香港人「把好關」。

最後，關於選委會亦負責提名立法會候選人同選舉部分立法會議員嘅問題，囍雨覺得問題仲簡單，如果選委會有權提名、選出香港嘅行政長官，咁佢提名立法會候選人、選出部分立法會議員，有咩問題呢？同樣重要嘅係，咁樣做無違反《基本法》，尤其喺香港大亂之後，咁樣做合法合理同合情。 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk