有朋友曾經講過，喺政治問題上，最討厭就係「騎牆派」，某啲政客或黨派「風吹邊一面」，就企邊一面，令人覺得完全無立場可言。近日，廣男「又睇到」關於民主黨嘅新聞，話說民主黨主席羅健熙表示民主黨區議員係咪會宣誓要「再討論」，但指相信宣誓係好個人嘅決定，難以「強逼」每個區議員一致行動云云。廣男真心想問，咁清楚明白一件事，民主黨都依家都無立場？宣誓又未有立場，係咪參選立法會又未有立場，民主黨有咩事係「有立場」呢？
虛無縹緲的陳述
據傳媒報道，對於區議員宣誓與否嘅問題，羅健熙話就算民主黨中委會有決定，亦會容許區議員彈性自行選擇，包括宣誓與否，甚至辭職等做法。另外，對於民主黨將來係咪會參選立法會，民主黨亦未有「最後定案」，相信仍有一段長時間讓黨內考慮同作出決定，羅健熙表示佢哋會衡量議會內實際仲能夠做到嘅事，最終議席比例、選委門檻等因素，但就直言黨內參選立法會意慾低，指現階段方案內容「好難哽」，無法評估民主黨能否「入閘」。簡單嚟講，就係關乎議席又關乎錢，民主黨就「傾咁耐」都無立場！
先講區議員宣誓嘅問題，請容許廣男講句，係咪要宣誓，根本係一件好簡單嘅事，如果民主黨對宣誓有疑慮，咁當初民主黨嘅區議員參選果時，又同意簽署聲明擁護《基本法》、效忠特區？即係聲明效忠特區就得，宣誓就有問題？呢個係咩邏輯？至於參選立法會嘅問題，其實民主黨係咁批評、質疑，直接話唔玩就得，點解依家「又要威，又要戴頭盔」呢？
關乎罪責 即有立場！
問題嚟喇，咁民主黨係咪咩都「無立場」呢？當然唔係啦！當有消息傳出民陣可能被取締，甚至可能涉違《港區國安法》後，民主黨就退出咗民陣工作喇，據報仲有民主黨成員稱「在風險越來越高下，退出民陣是迫於無奈」。睇真啲，民主黨實在十分「屈機」，關乎議席同錢，就一邊批評一邊「拖」；關乎「罪責」，就「走得快，好世界」，呢啲係咩，呢啲就係民主派喇！
香港未來嘅民主運動，廣男肯定黯淡無光，當中原因，就係代表「民主」嘅反對派，無立場、無骨氣甚至連原則都無；曾經「雄霸」立法會或者立法局嘅民主黨，廣男已經依稀見到佢哋式微嘅跡象。其實，想保住議席，不論係立法會或者區議會，直接講啦，依家係咁「質疑」同批評，轉頭如果又宣誓又參選，咪仲肉酸！
圖片來源：羅健熙社交網站專頁
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論