近日，因為民陣多年來都係一個「無牌組織」，亦因為被指涉嫌違反《港區國安法》，令到民陣再度成為各界討論焦點；囍雨留意到，民陣召集人陳皓桓近日接受訪問時，稱疫情加上《國安法》打壓，短期內難舉行遊行示威，但佢預視港人有朝一日亦要以「公民抗命」和平抗議，「不准遊行也要遊行、不能發聲也要發聲……各地都是如此，人民到了最壓迫的狀態就會出來，不合法也要做」。對於市民會唔會同民陣一齊「公民抗命」，囍雨唔肯定，但民陣覺得自己被打壓，囍雨請佢先睇下「國際標準」，包括英國、美國係點做！

英國欲修例 強力控示威

因為英國出現疑似「魔警」殺害夜歸女子案，大批民眾喺英國各地示威，警方最終要採取行動，「強力」驅散示威者，並解發衝突。其實喺同一段時間，原來英國國會審議「警察、罪案、判罪與法庭法案」（Police, Crime, Sentencing and Courts Bill），呢條法案可謂相當之辣，警方可以對示威施加好多限制，如強加開始同結束時間、制訂噪音限制，甚至可將呢啲限制應用到「一人示威」身上。據報，英政府推行嘅相關法例，造成「嚴重滋擾」嘅示威者最高可被判監10年；囍雨想問下，民陣覺得英國想立嘅法例有冇問題？香港又要唔要跟隨「國際標準」呢？

除咗英國，美國對待示威者可謂更加「唔客氣」，之前有示威者衝擊國會，有人被警方用槍擊斃，事後當局講明起訴數以百計嘅示威者，最高可囚20年；睇返美國部分地方例如肯塔基州，更想立法加強對暴亂相關罪行嘅刑罰，當中連言語侮辱、挑釁警員都可能要坐監，以鐳射筆照射警員、以揚聲器向警員大聲喧嘩，亦可能會屬刑事罪行。如果香港引入呢啲罪行，都唔知幾多「示威者」要伏法！

民眾失控 就要控制

其實，不論係英國、美國以至其他「西方」國家，就算有自由，都唔代表要俾示威者任意妄為。民眾失控，就要想辦法去控制；如果民眾係擺明針對警方，亦唔可能視而不見。當民陣以至其他反對派政客擺出一副被打壓嘅姿態時，有無諗過，如果佢哋係喺外國「民主」地方示威，當地警方更唔客氣呢？更何況，新冠疫情肆虐全球，全球各地都有類似嘅防疫或者社交措施，難道一般人要遵守，政客搞遊行集會就豁免？病毒平時會散播，遊行集會果時會「收工」？坦白講句，民陣呢個「無牌」組織，不論有幾「反政府」，想搞集會同遊行，都應該要睇時勢，專業啲啦！

圖片來源：新華社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk