香港新冠肺炎疫情仍然反反復復，尤其最近又有「健身群組」爆發，感染者「破百」，另外甚至仲有銀行大廈要暫時關閉、徹底消毒，好多人都擔心，香港會唔會有第五波疫情，但偏偏喺呢個時候，仲有人不顧疫情、無視防疫措施大搞「飯聚」。據報警方噚晚係灣仔一間扒房，查獲一個懷疑結婚派對，現場大約有28人參與，其中更包括反對派沙田區議員李志宏，以及中大學生會前會長周竪峰等人。囍雨即時諗，「咁玩法」，遲啲會唔會又爆個「扒房群組」出嚟？更憤慨嘅係，今次又係關反對派政客事？

又係反對派政客！

囍雨睇報道，有消息就話，除咗李志宏同周竪峰之外，原來仲有另外四名現任反對派區議員參與其中，包括沙田區議員黃學禮、離島區議員梁國豪、大埔區議員劉勇威，同大埔區議員陳蔚嘉。而且根據報道所講嘅情形，警方接報到場後發現涉事扒房「關門落閘」、無人應門；警方無意破門之下，雙方一度僵持逾四個鐘頭之後，先有人開門俾警員入內。囍雨想「推理」下，會唔會有人無視執法人員、繼續「飯聚」？又或者以為拖下拖下，就可以避過執法？

睇呢單新聞，好自然令人聯想起舊年4月，牽涉陳淑莊、林瑞華、張秀賢等反對派人士嘅「酒吧聚會」事件。上次，就40幾人酒吧群聚；今次，就廿幾人喺扒房開party。囍雨好想質問下，啲反對派政客係咪真當自己有特權、唔使守法嘅呢？如果相關新聞報道屬實嘅話，咁好明顯，呢個「扒房party」已經涉嫌違反防疫規例，而囍雨比較擔心嘅係，廿幾人「共處一室」，只要有一個人帶菌播毒，會帶嚟咩後果，大家其實可想而知，更何況如果真係有人有逃避法律責任之行為，咁大家認為，除咗向佢哋發出告票之外，係咪需要加以嚴懲呢？尤其啲區議員、公眾人物，係咪更加應該「罪加一等」呢？不過到呢一刻，呢班人似乎連一句道歉都冇喎！

不守限聚令的特權？

囍雨最睇唔過眼嘅，係呢班反對派人士，係咪為咗要表達與政府「抗爭、對著幹」，就可以連限聚令、防疫措施都可以唔遵守呢？如果「永遠」有人覺得自己有特權，可以「超然於」法例之外，咁香港疫情幾時先有完結嘅一日？一次又一次、一波又一波，如果全港市民努力抗疫嘅成果，次次都毀於一小撮唔守規矩嘅人之手，大家會係咩感受？

囍雨仲諗到另一個問題，唔知今次參與「飯聚」嘅幾位區議員，平日係點幫街坊、社區做防疫嘅呢？會唔會係「日頭」一個樣，「夜晚」一個樣？抑或，對別人一套，對自己又係另一套？

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk