正在還柙待審嘅民主黨主席胡志偉，據報正計劃修讀正規課程，希望喺在囚期間完成一啲學位，又叮囑喺監獄外嘅人保重自己、避免送頭，又話自己無諗過會被控違反《港區國安法》，刑期或以年計算，「讀完一個學位係基本，可能要讀兩個」，相等於約八年時間。正當廣男以為「坐監當讀書」係胡志偉嘅「嗜好」時，原來社民連岑子杰都有類似想法，有探監者仲形容岑「睇書睇得好開心」。讀書讀得「開心」，反對派向來又鼓吹「公民抗命」，佢哋有冇諗過秉承「公民抗命」精神，主動承擔「罪責」呢？

規訓與懲罰

據傳媒報道，當有人帶同法國哲學福柯著作《規訓與懲罰：監獄的誕生》到荔枝角收押所探望岑子杰，形容岑子杰睇書睇得好開心，仲話如果唔係入咗嚟，都無可能睇「咁多書」，又希望向外界傳遞「佢無事」嘅精神。真係啱啱遇著剛剛，《規訓與懲罰》呢本書廣男都睇過，呢本書有一個地方極度啱岑子杰以至其他反對派睇，因為犯人需要規訓，甚至需要改造！

雖然睇呢本書已經係幾年前嘅事，但廣男仲對本書有印象，福柯（亦有人譯為傅柯）喺書中就有提到要令人變得服從，使其可以改造及改善，社會上規訓嘅組織除咗監獄，其實學校、醫院以至軍事組織等，都有各自嘅規訓手段。當時廣男睇完《規訓與懲罰》，明白到一樣嘢，就係就算係自由社會，其實人並非完全自由，而係有限度嘅自由，規範、規訓喺社會唔同嘅地方出現，由細到大，由學校到職場都有，而行為有偏離嘅人，就要特別接受規訓。可能會有人認為呢種社會係一種「監獄社會」，但講真，今日嘅「民主」西方國家，其實一樣都係咁，社會如果欠缺規訓，秩序必然蕩然無存。

反對派有反思嗎？

唔同嘅人睇到福柯嘅書，可能會有唔同嘅反思，廣男唔知點解岑子杰睇得「好開心」，可能佢係認為佢只係「不幸」成為要被馴服、規訓嘅人。但如果大家問廣男，廣男就會覺得，反對派政客果種疑似要攬炒政府、顛覆國家嘅行為，其實去到世上任何一個地方都唔會容許，佢哋依家可能向外界擺出一副被打壓但無消磨鬥志嘅姿態，但廣男覺得佢哋最需要做嘅，其實係反思下自己到底係咪唔應該踩界。撇除違法與否嘅問題，如果一個從政者參選嘅目的係為咗同特區政府甚至中央政府「對著幹」，呢種心態真係無問題？如果俾佢哋入到議會，議會仲點運作？香港仲邊會有安寧之日？

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk