自從新冠疫苗面世後，美國、英國等地隨即開展全民接種疫苗計劃。據美國疾控中心統計，當地至今已完成超過1億劑疫苗注射，全國有近3分1嘅長者已經打晒2劑疫苗。反觀香港嘅情況就有啲滯後，接種計劃開展咗大約兩星期，全港有逾19萬人，即係大約2.54%人口接種，有專家估計按照呢個速度，可能要兩年時間先可以做到全民接種。大家可以諗吓，當世界各地正火速進行疫苗接種，如果香港跟唔上國際嘅步伐，仲邊有條件傾恢復經濟往來？
接種疫苗已成國際大趨勢
美國總統拜登早前提過，已要求各州確保所有成年人喺5月1日前打疫苗，爭取最遲喺7月4日獨立日前，畀國民恢復正常生活。世界各國、各地區都將打疫苗視為首要任務，只要越來越多人接種，就能夠保障到更多人民嘅健康，更好咁控制疫情，為恢復經濟提供基礎條件。接種疫苗成為國際大趨勢，多國已經開始為重開經濟制訂計劃，甚至將集點放喺「疫苗護照」上面。依家香港接種速度「慢人一拍」，唔單止好難同外國傾恢復通關，港人就連幾時先可以恢復日常生活都未知。
必須以科學數據分析事件
廣男都明白，本港近日出現疑似接種疫苗後異常反應嘅個案，引起部分人對疫苗安全性有擔憂。對於接種疫苗，其實大家應該以理性角度、科學數據角度分析，唔能夠因為事件發生喺接種疫苗之後，就斷定之間有因果關係。廣男想講，近期唔少異常個案涉及心血管同中風病徵，但如果按照醫管局數據，過往全港每日平均有10人死於心臟病發、7人死於中風，本身有個基數存在；咁大家就要睇睇，接種疫苗之後呢啲背景數字有無增加，而現時睇嚟似乎無呢個情況。
仲有如果按照全球不同國家醫療監管部門嘅數據，香港喺接種疫苗後出現異常事件報告，比例仍然相對地低。以接種每10,000劑計算，英國平均出現39.9宗異常事件報告、新加坡同澳洲就分別有38.2宗同23.4宗，而香港只係得7.6宗。而且香港採用嘅兩款疫苗，都經過專家做科學評估，無論安全、效能同質素都全部過關，世界各地都有不少人接種咗科興同復必泰疫苗，已證明其安全同有效，市民不用太擔心。
全球已經有130個國家或地區展開疫苗接種計劃，總劑量已超過3.4億。香港亦要急起直追，今日下午港府宣布擴大接種群組， 30歲或以上至59歲人士、16歲以上海外留學生及家庭傭工明起可預約接種疫苗。不論是為保障自己及身邊人，還是從社會、經濟方面著想，大家都應該踴躍接種疫苗。
圖片來源：政府新聞網
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論