全國人大會議日前通過完善香港選舉制度嘅《決定》，下一步，按照中央嘅思路同原則，香港政制改革勢在必行。香港有反對聲音質疑，人大決定係令香港「民主倒退」、「打壓反對派」云云。但廣男首先想問一句，中央喺香港推行「一國兩制」，唔通係想見到或者令到香港「民主倒退」咩？香港之所以有今日呢個局面，大家不如反問下，係邊啲人「成功爭取」？

中央早說明普選的目標及方向

呢個問題，令廣男記返早幾日，前基本法委員會前副主任梁愛詩嘅一句說話，大意係中央按照香港嘅情況推進選舉制度，一直希望香港嘅民主向前發展，但問題在於過去廿幾年嚟，香港自己一直無做好，所以依家就要重回正軌。而且其實喺1989年，由基本法起草委會員公布嘅《基本法》草案入面，就提出行政長官同立法會產生辦法，按實際情況同循序漸進原則，最終達致普選產生的目標。中央嘅立場一早講得好清楚，係想香港嘅民主可以向前走！

問題嘅關鍵在於，過去香港提出過幾次政改，反對派經常提出不切實際、甚至違反《基本法》、根本無法達成嘅要求，例如特區政府2005年嘅政改方案，提出增加選委會人數、立法會議席，反對派議員不滿政府無提出「普選時間表」，最終方案喺立法會遭否決；到2007年，全國人大常委會作出《決定》，明確香港可於2017年先普選特首，之後再普選全體立法會議員，即係已經有明確嘅時間表同路線圖，但係反對派仍然唔收貨。據報道，民主黨創黨主席李柱銘喺呢個問題上，仲話過「我認為香港有條件馬上實行民主，為何一定要等10年？」

反對派叫價脫離現實

2009年，特區政府提出新政改方案，反對派就喺翌年搞所謂嘅「五區總辭 變相公投」，要求2012年實現「雙普選」；至2014年特區政府啟動政改首部曲，但之後反對派發起「違法佔領」，逼中央接受佢哋提出所謂嘅有「公民提名」普選特首方案，但「公民提名」根本係違反《基本法》。最終，政改方案又一次被拖垮。

事實上，中央一早講清楚咗香港政改嘅原則，仲明確提出咗普選路線圖同時間表，原本，香港有機會分別喺2017年同2020年普選行政長官同立法會議員，只係班反對派不斷提出不切實際同不能實現嘅要求，要「即刻普選」要「公民提名」…香港今日點解搞成咁？反對派係咪真係想香港有民主？請反對派睇完上述事實，自己答多次！

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk