網絡世界，總係充斥千奇百趣嘅文章，大家可能以為關於政治嘅文章，一定係嚴肅、沉悶，但呢種想法係錯嘅。廣男近日喺網上睇到一篇「奇文」，用極度浮誇嘅手法「讚賞」戴耀廷，仲稱戴耀廷「遠遠不是認為自己已經全然擁有，而是希望透過抗爭的實踐、磨練，既幫助自己培養此等美德，亦有助香港成就民主自由」。其實，戴耀廷真係有助香港成就民主自由？佢似攬炒晒全個香港多啲喎！

戴耀廷「心靈美麗」？

喺某網媒，一個名為郭偉文嘅博客，寫咗一篇題為《戴耀廷的靈性思考及抗爭實踐》，一睇文章開頭，就知道篇文「非比尋常」，文章開頭就寫「戴耀廷，一個心靈如此美麗的人，卻受着現在的折磨、苦難，實在使人難受、悲憤和感慨 …」；尾段就寫「能有如此一位抗爭領袖，實在是香港之福。前路不知還有多少黑暗，但願他能夠堅毅地活出自己的靈性信念，既成就自己，又啟迪他人」。文章嘅具體內容，當然係「歌頌」戴耀廷，但用到咁兀突嘅手法，實在非常罕見！

認真講，廣男已經唔能夠用「Over」去形容呢一類文章，文章嘅「讚美之詞」，甚至令人覺得「好假」。文章嘅其中一段，係講到戴耀廷「遠遠不是認為自己已經全然擁有，而是希望透過抗爭的實踐、磨練，既幫助自己培養此等美德，亦有助香港成就民主自由」，廣男先不論戴耀廷對成個香港嘅禍害，喺反對派陣營，佢搞嘅「民主派35+初選」，幾乎攬炒晒所有重要嘅「同路人」，廣男實在唔明白佢點樣成就「民主自由」？

戴耀廷「謀殺」民主才對

從客觀環境睇，如果唔係戴耀廷喺2014年發動違法佔領、反對派否決政改方案，依家政制已經向前行咗一大步；又或者，如果唔係戴耀廷搞「民主派35+初選」，掀起咗一股「攬炒」議會甚至要同中央「跳崖」嘅思潮，立法會都未必會成為「攬炒政府」嘅目標武器。所以呢，戴耀廷不論係對內，定係對外，都係一個有害民主嘅「危險人物」先真！

包括戴耀廷在內嘅反對派政客涉違《港區國安法》而被檢控，傾向支持反對派嘅媒體，當然會用唔同報道、文章以至專訪去為佢哋「漂白」；不過，如果做得「太假」，或者措辭俾人感覺太浮誇，小心「造神」運動，會適得其反呢！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk