全國人大、政協兩會喺北京召開，相信中央一定會喺今次會議提出完善香港選舉制度嘅決定。坊間對於選舉制度有唔同聲音，而曾經為反對派喺立法會嘅「第一大黨」民主黨，似乎就比較關心將來條「DQ線」，仲話要思考下係咪會參選。廣男份人比較坦率，恕廣男直接啲講句，廣男估計民主黨絕對會參選，因為口裡面點樣鬧或者質疑係一回事，但民主黨嘅「身體」，先係「最誠實」嘅！

批評是一回事 行動又是另一回事

據傳媒報道，民主黨領導層對政制改革「頗有意見」，佢哋嘅黨主席羅健熙就聲稱「他要DQ甚麼人，我覺得並不控制在我們手上，我覺得到現在為止，我還是相信做好自己工作，繼續說一些自己相信的說話，繼續與市民保持一個良好關係。究竟最後是否讓民主黨入閘，或者最後民主黨是否會參選，我覺得這是下一步再思考」，廣男要提提大家，選唔選，延唔延任等等，民主黨好多時考慮完，都係會「去馬」㗎。

去年立法會選舉延期，當時以民主黨為首嘅反對派政客，一邊批評延任有問題，甚至質疑延任嘅議會缺乏認受性，結果搞完一輪「大龍鳳」，甚至搵埋民調機構做民調，最後見到支持者嘅意見「紛紜」，佢哋作出「政治決定」而延任；其實當時，主流民意係想佢哋「走」，佢哋只睇所謂「支持者」意見，繼而作出「政治決定」。試問一句，如果要做政治決定，咁當初做乜要搞民調呢？

政客作風 議席優先

一直以嚟，民主黨之所以被視為反對派「第一大黨」，係因為之前不論係喺立法會定係區議會，佢都係議席最多嘅反對派政黨，就算依家佢哋無晒立法會議員，都大約仲有90個區議員，如果佢哋將來唔參選，咁90個區議員會唔會變成失業大軍？又或者佢哋將來唔參選，民主黨嘅政治影響力，咪即刻暴跌至「零」？為利益、為影響力，廣男絕對唔會高估民主黨嘅「骨氣」。

至於將來政府會點DQ人嘅問題，其實大家應該問返民主黨係咪愛國者先真；如果民主黨人都係愛國者，點會怕俾人DQ呢？舉個例，如果係愛國嘅從政者，又擁護《基本法》、效忠特區，相信唔會有問題；相反，之前有民主黨成員竟然喺街度掛上侮辱甚至誣蔑國家領導人嘅宣傳橫額，又點會係愛國？DQ與否，唔係話中央同港府「條線」喺邊咁簡單，仲要睇包括民主黨在內嘅反對派政客做過啲咩，有冇傷害過國家利益嘅！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk