最近，新聞不斷出現關於幾十名反對派政客因涉犯《港區國安法》而被還押嘅新聞，當中最令囍雨反感嘅，唔係被告以至被告支持者嘅抹黑聲音，而係諸如許智峯、羅冠聰之流不斷喺度抽「政治水」，明明自己走咗佬逃避審訊，仲好意思扮戰友、手足？最新消息，係「流亡英國」嘅許智峯，已經「走佬」到澳洲，佢仲喺社交媒體發表感言，話要轉戰澳洲「繼續面對面的國際遊說工作」，走得咁急，大家話有冇古怪？

為香港 還是為家人？

對外公開嘅「故事」，通常都係說得「動聽」，例如許智峯喺社交媒體長篇大論，大抵意思，就係話英國、歐洲有羅冠聰等人；美國、加拿大亦有「成熟及緊密的組織」等等，相反「流亡澳洲、全職投入遊說工作的香港政治領袖卻較少」，所以佢決定「轉戰澳洲」。呢個版本，聽落好好聽，但睇政客講嘢，都係睇真啲、聽真啲好。

睇返許智峯嘅「感言」，佢提到「考慮了很多國際形勢及策略的分析，也有家庭的考慮」，之後又聲稱「除了客觀的形勢分析外，我家人於澳洲的親友支援亦更多。安頓好家人，就可安心走更遠的路」；恕囍雨坦白講句，去澳洲打國際戰線？似係為家人嘅生活安排多啲囉！之前講過要喺英國、歐洲打國際戰線，轉頭又「飛」咗去澳洲，許智峯講嘢「一時一樣」，大家應該幾時信佢？

說好的不尋求庇護呢？

如果大家仲有印象，應該記得許智峯之前流亡英國，類似講過「我永遠不會移民，永遠無法在另一個地方落地生根，我的家只有香港」，矢言唔會申請政治庇護，不過今次佢「走佬」澳洲嘅許智峯，就表示「目前未有申請政治庇護的想法，除非日後別無選擇，否則申請庇護會是我最後的選項」，咁即係點？之前又話永遠唔會喺另一地方落地生根，但依家又可能喺澳洲尋求庇護，落地生根？許智峯講嘅嘢，真係信「一成」都死！ 

最後，囍雨留意到許智峯喺某媒體訪問入面，講到全家流亡，一對子女無法上學，不懂英語的父母亦難有社交時，佢自己「未能釋懷」，稱「唔係我，佢哋唔使搞到咁，搞到佢哋要離鄉別井，以後都返唔到去」，其實許智峯隨時可以返嚟，係佢自己逃避審訊甚至刑責，仲要「連累」家人啫！再講一次，許智峯唔係受害者，而係有份攬炒香港、涉嫌違法嘅禍港政客！

原圖：許智峯facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk