為全面落實「愛國者治港」原則，中央提出採取「決定+修法」嘅方式，完善香港特區選舉制度，連日嚟大家都好關注，香港政改究竟點改。囍雨留意到，有啲民主派人士或者反對聲音就認為，人大相關決定係「香港民主倒退」、係中央想「操控議會」、「收窄民主派參與空間」云云。囍雨首先想講嘅係，呢啲睇法似乎忽略咗一個客觀大前提：中央政府喺香港推行「一國兩制」，會想見到香港「民主倒退」咩？調番轉頭嚟諗，如果香港真係「民主倒退」，對「一國兩制」有咩好處？如果要「收窄」或者「打壓」民主派，何必搞「一國兩制」？

對於香港今日有咁嘅局面，囍雨就覺得，基本法委員會前副主任、前律政司長梁愛詩日前嘅一番說話，或者值得大家參考、反思。佢所強調嘅意思係，中央按照香港嘅實際情況推進選舉制度，一直都希望香港嘅民主向前發展；要怪，只能怪過去呢廿幾年嚟香港自己冇做好，依家係時候要醒覺、要重回正軌。

反對派多年前就開始「反」

問題嘅關鍵嚟啦，過去呢廿幾年，香港大大話話搞過幾次政改，但結果呢，究竟發生咩事？的確，香港政改嘅「前世今生」，大家冇辦法三言兩語就講清講楚，但囍雨睇番一啲資料同報道，就覺得當中有啲時間節點同事件，有必要再同大家「重溫」一下：

- 特區政府2005年嘅政改方案，提出逐步取消區議會委任制，又承諾2007年提出普選時間表，但當時多數泛民立法議員就堅持反對，其中時任民主黨主席李永達就要求政府撤回方案之餘，再推出一個不遲於2012年普選行政長官嘅方案；陳方安生甚至呼籲時任特首向中央建議，最遲於2012年落實「雙普選」。

- 2007年，全國人大常委會作出《決定》，明確香港可於2017年普選行政長官，並喺普選行政長官之後可普選全體立法會議員。但泛民仍然唔滿意，時隔多年後，民主黨創黨主席李柱銘喺一個專訪中宣稱，「基本法規定頭10年不能普選，但我認為香港有條件馬上實行民主，為何一定要等10年？」

- 2009年特區政府提出整改新方案，結果翌年泛民就發動所謂「五區總辭」同「五區公投」，要求「盡快實現真普選、廢除功能組別」。

- 去到2014年，「真普選聯盟」又提出所謂「公民提名」嘅普選特首方案，甚至揚言若政府方案未能滿足此要求，會考慮參與「佔中」…

囍雨想講，當反對派不斷以「民主鬥士」自居、一次又一次反對政改方案時，其實有冇遵守同尊重過《基本法》呢？《基本法》對於香港政改嘅原則，一早就明確提出「循序漸進」以及「適合香港實際情況」等表述，大家留意，中央唔單止從來冇冇否定過香港可以有普選，仲提出咗時間表同路線圖，但班反對派想要嘅係咩？係「馬上普選」、「不遲於2012年」、「公民提名」…，簡單而言，就係不斷要求政府、中央去做一啲根本唔符合、甚至違背《基本法》規定嘅事情。囍雨又想問下，《中英聯合聲明》又好、《基本法》又好，幾時寫過香港有「公投」、「真普選」？點樣嘅普選先叫「真」？

「鍊爆」的結果！

對於呢啲問題，唔通反對派會唔知咩？囍雨就覺得佢哋係「明知故反」，不斷開出無法達成的訴求，搵藉口反政府反中央，結果點？結果就係藉住由2014年違法佔領、2016年旺角暴亂、以至2019年嘅反修例風波，一步步走到今日發動奪權、政變，勾結國外勢力搞顛覆、搞顏色革命，所以囍雨話，香港有今日嘅局面，又係多得反對派「鍊爆」嘅結果！

可惜，我哋冇時光機，冇辦法時光倒流去睇下如果當初冇人搞破壞、推倒政改，香港今日會係咩局面；但按照中央同特區政府嘅時間表、路線圖，囍雨喺度諗，原本，香港嘅民主進程可能會比現時進步好多——如果過去呢廿幾年，冇咁多「人為阻滯」嘅話…

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk