美國傳統基金會（下簡稱「基金會」）日前發表2021年度全球經濟自由度指數，但今年就搞出「新玩法」，將香港同澳門剔出評級，納入與中國內地一併計分，即係唔再將香港視為單獨經濟體。按照基金會嘅講法，主要原因係香港經濟政策「明顯受中央控制」，而基金會創辦人就形容，過去兩年香港「失去政治自由和自主」，以致與其他內地城市例如北京、上海無異。廣男十分唔理解，依家基金會嘅做法，即係以政治因素判斷經濟自由？
事實上，自從基金會設立經濟自由度指數呢27年以嚟，香港已經連續25年被評為全球最自由經濟體，即使舊年被新加坡「爬頭」，亦都排名全球第二，但喺基金會「新標準」之下，香港今年嘅排名第107位，有報道就話仲低過烏干達等一啲非洲國家。特區政府以至財金官員如財政司司長陳茂波、財經事務及庫務局局長許正宇等，都相繼批評基金會係出於政治偏見，唔係基於事實、亦都毫無理據，對香港非常唔公道。關於呢一點，廣男無意貶低其他經濟體，但大家齋用常理去判斷下，基金會嘅評級結果，符唔符合香港經濟嘅實際表現呢？
排名第一的新加坡 也有國安法律
如果話香港「受中央控制」，廣男首先就唔認同呢種表述。回歸之後嘅香港，本來就係中國一部分，中央對香港一向擁有全面管治權。但另一方面，喺「一國兩制」之下，香港繼續保持資本主義制度、單獨關稅區地位，亦都從來以單獨經濟體身分同其他地方進行經貿往來，如果呢啲唔係事實，香港點會連續25年排名第一？
再者，如果基金會話香港過去兩年「失去政治自由和自主」，係關香港落實《國安法》事，咁廣男又想問下，連續兩年排名第一嘅新加坡，又有冇類似嘅國安法律呢？根據公開資料，新加坡相關法律主要針對嘅，就包括防範顛覆、應對恐怖活動，點解基金會又唔批評新加坡「失去自由自主」？點解新加坡可以有類似法律，香港就要被指摘、抹黑？
如此「指數」 還有公信力？
廣男就認為，依家基金會搞呢啲「小動作」，根本就係基於意識形態同政治偏見，甚至又係想借香港、打中國，或者作政治宣示，但基金會咁做，究竟對香港有幾大實質影響呢？廣男睇過有分析就話，其實影響唔大；原因之一，就係有關指數係來自美國智庫，而並非銀行或者金融機構。正如廣男上文所提，香港嘅實際經濟環境、自由程度係點，其實大家都有眼見；大家諗下，香港咁耐以嚟所建立嘅經濟地位，係咪一個基於政治考慮作出嘅評級，就可以貶低、動搖呢？最後被「貶低」嘅，會唔會係基金會同呢個「指數」嘅公信力？
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論