47名反對派人士組織或參與「民主派35+初選」，涉犯串謀顛覆國家政權罪被起訴。囍雨留意到有新聞報道，指部分被告宣布退黨，亦有政治團隊宣布正式解散。囍雨唔敢斷言佢哋出於咩原因退黨或解散團隊，如果係因為怕負上刑責，或者怕無得保釋而咁做，其實佢哋以至其他反對派有冇諗過，過去一年多時間，有好多參與反修例運動嘅青年被告上法庭，多多少少都係因為反對派鼓吹抗爭，如果佢哋今日驚喇，咁當日佢哋支持青年抗爭，難道其他青年就唔駛驚，可以放膽去「違法達義」？

退黨未必能保平安

先不論係割席，定係已經無所謂嘅「齊上齊落」，囍雨都要率直啲講句，退黨未必能夠保安全嘅，因為佢哋過去做嘅事，其實控方、法庭以至社會都睇得好清楚，囍雨覺得，要法庭相信一眾被告唔會「繼續實施危害國家安全」嘅行為而批准保釋，相當唔容易，不過一切都要法庭作公正裁決。

囍雨最想講嘅係，人面對刑責，或者面對好可能無得保釋嘅局面，可能會用盡一切方法「保平安」，所以就算一眾政客被告點做，都係人之常情。問題在於，政客如果怕坐監、怕無得保釋，難道一般年輕人就唔怕咩？當初反對派政客支持抗爭，甚至企喺前線幫涉嫌違法嘅年輕人「擋」警察果時，有冇諗過果啲年輕人都可以變成被告，都可能要喺犯人欄受審甚至坐監？反對派政客係咪自己就怕坐監，但覺得年輕人就唔怕坐所以可以支持佢哋去抗爭？

將心比己 你想坐牢嗎？

相信反對派政客自己都唔想負上任何刑責，咁佢地當初支持抗爭等等，老實啲講其實就係推啲年輕人「去死」。今日，睇返公開資料，自反修例運動開始，超過一萬人被捕，當中約四成為學生；換句話說，好似反對派咁受審、面對無得保釋嘅情況，成日都喺法庭發生，只係一般年輕人唔會好似政客咁受關注！將心比己，如果佢哋一早就係「被告之一」，仲會唔會可以咁輕鬆講抗爭，又或者講一啲類似「案底令人生更精彩」嘅風涼話呢？

我哋都無時光機，唔可以回到過去，囍雨但願經過呢件案，「下巴輕輕」嘅反對派政客，唔好再胡亂叫人抗爭，因為你哋自己都唔想負刑責，好心就唔好推啲年輕人「去死」！違法達義？既然違法，就要「找數」，如果人要等到自己面臨牢獄之災先懂得醒覺，囍雨只能講句，為時已晚！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk