廣男近期睇咗唔少移民到世界各地嘅港人，大談親身經歷以及內心感受嘅視頻。其中一則，係一位香港「中佬」攜家眷移民台灣之後，細數「移民兩個月，我老婆後悔」嘅六大原因，令廣男真心估唔到嘅原因之一，竟然係去到台灣之後「無工人」，洗衫、抹地、煮飯…統統都要自己包辦。於是中佬建議，不如大家過「極簡生活」，例如每人限五套衫，買新之前必須先丟一套舊；盡減雜物、傢私，務求「連塵都唔使抹」。果一刻，大家先發覺，原來以前喺香港嘅生活，已經「極簡」，因為所有家頭細務都有工人打理，自己每日只需要專心於返工呢一件事…

睇完呢一家嘅故事，廣男「笑咗」，亦都不禁感慨，一部分歎慣享受慣嘅香港人，去到人哋嘅地方、做人哋嘅二等公民，仲以為自己「大晒」？試問，去到與香港同宗同源嘅台灣尚且如是，果啲「漂洋過海」去到英倫彼邦嘅港人，又如何？其實只要翻翻報道、上去網絡討論區，你會發覺類似嘅「心路歷程」仲有唔少，廣男今日就同大家分享兩例。

部分港人的「劣根性」？

據報道，有位港人移民去到英國某公司見工，見對方態度「好有誠意」，不停向佢分享公司嘅優點，仲講到好似好想佢加盟咁，就以為自己「實掂」，點知過咗一排都收唔到通知，於是就鬧爆英國人「好假、好虛偽」。廣男十分好奇，人哋對你客氣、有禮貌，你就鬧人「虛偽」，咁如果人哋「黑口黑面」，你又想鬧咩？

另外，據報路透社最近出咗篇報道，話根據地產中介反映，香港人喺英國買入好多住宅同公寓，主要目的都係用嚟出租賺錢，甚至直接令到英國主要城市嘅樓價被炒高一成至一成半不等，其中利物浦區同車路士區嘅樓價，都至少被炒高咗一成…其實，呢班人係咪打算將香港嘅炒樓文化帶去英國呢？

廣男就覺得，上述例子可能或多或少都反映出一部分香港人嘅「自我優越感」同「劣根性」；無論係稍有不滿就「唱衰」對方，定係利字當頭去推高當地樓價，部分香港人呢種以為自己去到邊都「大晒、做乜都得」嘅性格，隨時可能好快引起英國人嘅「反感」。事實上，英國人對香港人嘅歧視心態由來已久，亦都從來唔歡迎港人移民，依家之所以肯對港人提供「入籍途徑」，廣男就話，一方面係政客出於政治考慮，另一方面係睇中香港人才同錢財，需要有人去為英國經濟「作貢獻」，但講到骨子裡，人哋會唔會因為你成為或者即將成為「英國公民」，就當你係「自己人、一家人」看待？咪天真啦！

不要搞到「乞人憎」

上述移民例子，或者可以提醒大家反思至少兩點，首先，好多你想「追求」嘅嘢，可能原本就喺香港已經擁有，之不過偏偏有人身在福中不知福；再者，有啲人喺有得做一等公民嘅自己地方都諸多不滿、好似全世界欠咗你咁，呢種人去到其他地方，又點會受到尊重？！廣男最後勸一句，想移民，好行夾唔送，但唔該你「紓尊降貴」，唔好搞到周圍乞人憎，更加唔好影衰其他正常香港人。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk