如果你係一間公司嘅員工，有新老闆今日上任，你會做啲咩？夾道歡迎老闆？定係預備見到老闆就殷勤地打招呼，好好介紹自己？被指為「獨立王國」嘅香港電台，一班工會成員噚日就係新廣播處長李百全上任前，身穿黑衣，攞住寫上「沒有李百全就沒有新港台」、「大海航行靠舵手，公營廣播靠的是李百全」、「百全是我心中的紅太陽，定堅決守護真實《約章》守則」嘅標語為新處長上任「贈慶」；呢啲說話橫睇掂睇，似乎係未了解新處長作風，就先指桑罵槐玩「人身攻擊」。廣男十分好奇，點解作為政府部門員工嘅港台人員，可以惡成咁嘅呢？
聽其言、觀其行？
港台節目製作人員工會主席趙善恩噚日表示，期望李百全能夠「知行合一」，尊重員工聲音，亦促李捍衛升遷制度云云；仲話港台員工一直恪守《約章》、節目製作人員守則同通訊局嘅要求，當中嘅精神唔可以斷章取義，同事會依新聞專業標準繼續報道，未來工會將「聽其言、觀其行」。聽完港台工會嘅人員咁講，廣男實在懷疑，港台人員先係「老闆」，而李百全則係被「觀察」嘅「員工」。
對於工會代表稱港台員工一直恪守《約章》（《香港電台約章》），廣男想問下，如果港台員工一直恪守《約章》，無違過規，咁《頭條新聞》被投訴侮辱警員，係咩一回事？《左右紅藍綠》嘉賓扭曲暴徒佔領理大事件，想屈警方「圍攻」理大，又係咩一回事？其他關於港台節目嘅問題，有《The Pulse》主持疑似暗示台灣有國家地位，《台灣故事III》直指台灣係國家，甚至港台新聞借佐敦封區政府派罐頭一事誤導市民，呢啲又係咩呢？
如果港台員工連節目出問題都唔承認，就想將矛頭指向政府以至新上任嘅處長，公平咩？講到聽其言、觀其行，應該係新處長觀察佢哋言行先真！
不能助長嘅歪風
廣男唔知道，港台工會出於咩原因，可以行出嚟擺出一副高姿態，甚至俾「下馬威」新處長，係因為佢哋係公務員？定係因為掛住「工會」名義，所以就可以攻擊自己上司？港台人員，可能係世界上最惡嘅員工，正因如此，新處長真係要好好整頓佢哋，同時要令港台變返遵守《約章》、能為政府所用嘅政府部門。
圖片來源：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論