全國政協副主席、港澳辦主任夏寶龍日前一連兩日喺深圳召開座談會，就香港特區如何完善選舉制度、落實「愛國者治港」問題，聽取香港各界人士嘅意見和建議。值得留意嘅係，夏寶龍嘅另一職銜，係「中央港澳工作領導小組常務副組長」，對於有中央涉港工作嘅重量級官員「親自南下、聽取意見」，囍雨認為所傳遞嘅訊息，就係中央今次對於將香港管治團隊撥亂反正、正本清源嘅決心相當大。原因至少有二：一係近年有香港反對派人士搞奪權甚至搞分離，已經去到危害國家安全嘅地步，中央冇可能再唔出手；二係雖然「愛國者治港」呢五個字，由《基本法》起草階段至今都貫穿始終，但講到具體落實，成效明顯有所不足。

落實「愛國者治港」的部分建議

事實上，喺兩日嘅座談會期間，香港各界唔同人士都提出咗唔少落實「愛國者治港」嘅建議同辦法，囍雨綜合媒體相關報道，今日就幫大家作一個簡單梳理，從中或者可以睇到日後香港政改嘅一啲端倪。

其中，全國人大前常委范徐麗泰就大致提出咗五點建議，包括：

- 取消特首選舉委員會中，區議會界別117個席位；

- 將港區全國政協列為特首選委會當然代表，並納入全國工商聯、婦聯、青聯等組織；

- 取消立法會選舉中5個「超級區議會」議席；

- 將立法會選區「拆細」為十區（現行為五區），並以雙議席單票制方面選出議員；

- 所有立法會選舉候選人，提名人當中應有若干選委會成員。

除咗范太嘅上述建議之外，其他一啲與會者嘅建議，囍雨認為亦都值得大家留意、參考，例如：

- 全國人大常委會香港基本法委員會副主任譚惠珠：取消五個超區議席，由一批能夠推動兩地互補、融合發展的人士代替；功能組別的選民，應該要求有四至五年的服務紀錄。

- 全國港澳研究會副會長 劉兆佳：由一個有權力、高規格的單位負責候選人資格審查，相關制度可套用在立法會、區議會和選舉委員會的選舉之上。

- 基本法委員會委員陳弘毅：在完善選舉制度上，應該由中央行使主導權，通過全國人大或全國人大常委會制定基本原則、方向和框架。

無論如何改 「一國兩制」不會變

綜觀上述政改建議，囍雨認為其中涉及嘅層面已經頗為廣泛，包括審查機制、入閘機制、優化香港政治光譜等，而最最重要嘅，當然就係保障香港特區政權架構入面，重要崗位、重要權力以及重要管治責任嘅人士，都係愛國者，同時亦都保障中央全面管治權嘅落實。囍雨喺度諗，如果日後政改真係朝住上述建議嘅方向或者思路去執行，其實依然冇扼殺到反對聲音或者「忠誠反對派」嘅存在，但如果再有人想陽奉陰違、混入管治團隊搞奪權搞破壞，相信難度極高。

喺呢一刻，囍雨唔可以話，上述建議就一定等於日後嘅政改方案，但隨住全國兩會本周內召開，相信好多內容會納入兩會代表、委員討論嘅範圍，甚至唔排除兩會之後會有更具體嘅方案出爐，大家拭目以待。不過囍雨可以肯定嘅係，無論香港政改如何改，「一國兩制、港人治港、高度自治」呢12個字，一定唔會變！

原圖：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk