港府早前宣布將會修例，建議訂立公職人員違誓處分機制，並設立「正負面清單」清單列明「擁護基本法、效忠特區」嘅定義。草案一出，唔少人即刻諗起立法會議員鄭松泰，因為佢之前因侮辱國旗同區旗被判罪成， 想知到底佢會唔會喺修例通過之後被DQ。正當社會議論紛紛之際，鄭松泰即時出嚟回應，重申自己已經為事件致歉同承諾「改過遷善」，會繼續擁護《基本法》；佢仲話日後如果有幸當選連任，「必在宣誓就職之時再次公開宣示之」。廣男覺得，鄭松泰知錯能改咁咪幾好囉，反對派都應該向佢學習，做好忠誠反對派嘅角色。
醒目的鄭松泰
廣男覺得，鄭松泰都算係「識時務者為俊傑」，舊年反對派對係咪接受「延任」仲係扭扭擰擰嗰陣，鄭松泰就率先表態會留任；之後反對派搞立法會總辭，佢又無跟大隊，繼續留任。鄭松泰可能係基於議席、名譽地位或薪津嘅考量而作出決定，但起碼做啱咗選擇。依家鄭松泰又對侮辱國旗事件再道歉同重申立場，都算係對其他反對派做出唔錯嘅示範。不過鄭松泰唔能夠只係得把口，日後嘅行為都要俾大家睇到，佢願意改過，符合愛國者嘅標準。
並非「清一色」、「一言堂」
廣男認為，立法會議員只要係實事求是、理性討論，可以有唔同意見同反對聲音；但係必須遵守底線同原則，唔可以作出危害國安家全嘅行為，亦要擁護《基本法》同香港特區。如果有人心懷不軌，想一邊出任公職，一邊搞「攬炒」、密謀奪權，同中央同港府對抗，咁樣當然絕對係唔能夠容忍。今次當局修例嘅目的，就係想進一步落實「愛國者治港」原則。如果立法會議員都係由愛國者出任，日後拉布、搗亂議會嘅情況應該就較難發生，議會運作就能更加順暢，審理民生、經濟議案就更有效率，咁樣對廣大市民嚟講絕對係好事。
「愛國者治港」原則並唔係要「清一色」，亦唔係要「一言堂」，呢一項要求只是相當基本，作為公職人員都應該要做得到。大家要清楚一點，有「一國」嘅前提先會有「兩制」存在，中央對香港有全面管治權。如果有人想「去中央化」、將香港變顛覆國家嘅基地，打算「另起爐灶」，危及到國家主權同安全，中央一定唔會袖手旁觀。
圖片來源：中通社
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論