財政司司長陳茂波噚日公布《財政預算案》，一如所料，「派糖」比往年少，甚至有地方要輕微加稅或加收費用；喺呢個情況底下，反對派自然會發揮好佢哋嘅「凡事反對」功能，出嚟大力批評《預算案》啦！廣男留意到，曾經為立法會裡面反對派第一大黨嘅民主黨，就直言新一份《預算案》唔合格、無設立失業援助金令港人失望、推出失業貸款係不切實際，要求政府向市民直接派錢云云。其實，依家呢個經濟環境，再睇下政府嘅財政赤字，廣男反而想問，係咪要政府繼續「狂放水」先得呢？
「減糖」難以避免
睇返政府數字，政府喺2020/21年度嘅預計赤字超過2,500億元，經濟數據方面，香港整體經濟去年上半年大幅收縮9%，第三稍見改善，但第四季後期至今又再受疫情打擊，去年全年合計經濟收縮6.1%，係有記錄以嚟嘅最大年度跌幅。政府出現巨額財赤，而經濟環境又嚴峻，民主黨想政府點「派錢」呢？
事實上，政府雖然無直接派錢，但亦表明會分期派總數為5,000元嘅電子消費券俾市民，市民可以用嚟購物，亦可以用嚟應付日常生活所需；相反，廣男睇新聞見到有民主黨成員認為「庫房有能力向全民派發1.5萬元」，老實講，經濟好嘅時候，政府都未必有能力派咁多錢，更何況政府已經派過一次錢，加上依家財赤？
若在議會 民主黨會拉布嗎？
見到民主黨等反對派「條件反射式」地反對《預算案》，廣男就喺度諗，如果民主黨仲有成員係立法會議員，佢哋會唔會係咁拉布呢？會唔會不看理據投反對票否決《預算案》呢？又或者，會唔會好似啲「本土派」咁，無差別地否決所有政府議案、《財政預算案》？然後脅逼政府答應佢哋嘅政治訴求？老實講，今時今日，仲抱持「凡事必反」嘅態度，其實已經不合時宜喇，民主黨如果仲想保住從政之路，應該走理性論政嘅「和理非」之路！
之前政府推出過兩、三輪防疫抗疫基金，廣男記得民主黨等反對派政客都曾經投過反對票，如果佢哋之後仲係用呢種態度去論政，係咪效忠特區？係咪愛國者？相信大家心中有數！
圖片來源：民主黨Facebook影片截圖
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論