港澳辦主任夏寶龍日前喺一個研討會重申中央嘅「愛國者治港」立場，又點出愛國者嘅客觀標準；恰巧地，噚日特區政府又提出修例，規管公職人員宣誓及取消資格（DQ）嘅相關規定，又列出引入「正負面清單」，當中危害國家安全、反對《港區國安法》、無差別地反對港府議案等，都係被DQ嘅準則。囍雨覺得，政府提出修例，可謂係中央既定方針嘅一種實踐，而且立法會議員、區議員本來就要聲明擁護《基本法》、效忠特區，依家將宣誓內容及違誓後果具體化及規範化、講清講楚，實乃應有之義、必要之舉。
並非要趕絕反對派
對於政府提出修例，反對派當然繼續「反」啦！囍雨睇新聞，見到公民黨表示宣誓條例「改革」選舉制度，議會內外趕絕反對聲音；港大法律學院首席講師張達明就稱，引入正負面清單，當中有好多表述「偏離香港法律清晰明確嘅要求，可以係主觀嘅、因人而異」云云。呢度有兩個問題，第一，修例係咪要「趕絕」反對派；第二，政府提出嘅「正負面清單」，係咪主觀、因人而異呢？
對於「趕絕」嘅問題，公民黨成立多時，成員當中又有唔少法律界人士，佢地唔係唔知道所屬成員參選時要聲明擁護《基本法》、效忠特區呀？唔通政府唔可以修例具體化有關安排？更重要嘅問題係，如果無「反中亂港」之心，反對派又何懼之有呢？
至於一旦修例通過之後，喺舊年參選立法會選舉時已經被依法裁定提名無效嘅4名現任區議員岑敖暉、袁嘉蔚、鄭達鴻、梁晃維，將會失去區議員議席，有人批評係「封殺、扼殺異見」，恕囍雨直接啲講，其實件事唔需要去到咁複雜，呢班人唔擁護《基本法》、唔效忠特區政府，根本連擔任公職人員嘅基本資格都冇！
政府要求合理、清晰
至於張達明質疑修例（應包括引入正負面清單），囍雨認同香港法律嘅清晰明確要求，不過囍雨睇返今次修例嘅正負面清單，無論係關於危害國家安全、「變相公投」、侮辱或貶損國歌等「清單」，其實都幾清晰易明；再者，普通法應用時，唔係不時都用到合理人或明理人（Reasonable Man）嘅準則去判斷行為是否合理咩？係咪唔擁護《基本法》、效忠特區，應該唔難理解呀？而且，個案最終由法庭裁定，唔係由官員「說了算」，反對派唔會連法庭都懷疑呱?
老實講，如果有人問囍雨，囍雨覺得今次修例，其實只係符合愛國者治港嘅最低標準；想做議員、公職人員，擁護《基本法》、效忠特區，係最基本同根本原則。如果有政客唔想宣誓、唔想遵守相關行為規範，又唔想效忠政府同自己嘅國家，好簡單啫，唔好做議員或者公職人員，相信香港人都唔想香港嘅議員係「拿着公帑，反中亂港」！
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論