香港青少年總會成立，又軍訓又中式，難免會畀人抽水，廣男睇到某位「資深」傳媒人嘅文章，真係睇到廣男O晒嘴，屈人洗腦不再話下，仲講到「半軍事」訓練可能會導致犯法，又話受訓同學會協助監察其他同學、老師。唉，其實反正都係吹水，我係某「資深」傳媒人就吹大啲喇，可以話參加既同學會批鬥父母，甚至會暗殺政敵都得啦，應該將創意發揮到極致先多人睇架嘛！

不過，某「資深」傳媒人寫嘅文章，其實都唔係廣男今日要講既重點，「資深」傳媒人咁「資深」，寫嘢又有創意，真係好難批判架！廣男今日要講既，都依然係廣男最愛既黃之鋒同學，話說佢近日接受訪問，就質疑青少年軍係強制同洗腦，說話義正詞嚴，好不威風。引用佢嘅講法，不斷向人灌輸一啲觀念，可能已經係洗腦架喇！

唉，搞軍訓，洗腦！內地交流，洗腦！青少年軍成立，一定係洗腦！不過，乜洗腦咁容易既咩？如果去幾日交流團就洗腦，佔領中環都唔洗用一年零九個月叫人犯法啦，戴耀廷呢頭寫完篇「佔中」文，轉頭就萬人「佔中」先啱喎！

如果要講洗腦，黃之鋒同學民思潮一定係當中既表表者。當政改討論仲未兩極化嘅時候，佢哋已經日日叫公民提名，不斷loop不斷Loop，如果其他人提出嘅方案無公民提名，好難唔畀佢哋鬧，湯家驊就係一個好例子啦！到戴耀廷提出要佔領中環之後，學民仔又不斷宣揚違法行動，煽動學生衝入政總，黃之鋒仲要質疑點解成年人唔企出嚟，講到好似唔「佔中」就係唔民主咁。如果講強迫（或者強制）同埋洗腦，邊有人夠黃之鋒同學民思潮玩，佢哋口中既「救救孩子」，點救法大家真係要睇真啲！

所謂「來說是非者，便是是非人」，今日行出嚟話人洗腦嘅人，如果大家諗真啲，果班人係咪先係專洗人腦，叫人搞事嘅始作俑者呢？

原圖：hket