身為英國自由民主黨員、前牛津市議員、人權監察創辦人、鼓吹西藏「自決」者，「身份多多」嘅新任大律師公會主席夏博義受到坊間極大質疑，唔少人都要求佢辭去大律師公會主席一職；不過，夏博義似乎就無正面回應要求，佢日前接受媒體訪問，就聲稱無隱瞞政治背景，所以唔會辭職。其實，有冇隱瞞係一件事，香港市民係咪接受一個英國政客做香港大律師公會主席，又係另一回事喎！

夏博義的「修辭技巧」

對於外界嘅質疑，夏博義當然有佢嘅回應方式，例如講到佢身為英國自由民主黨嘅成員，佢就話如果佢辭任（牛津市議員），佢哋（大律師公會）唔認為佢嘅黨籍有問題；又話佢回港後，已經完全不活躍（黨務），佢會繼續維持不活躍，只要佢繼續任喺香港嘅話。佢有份創立嘅人權監察，曾經收過「美國國家民主基金會」捐款，夏博義就表示「我們從來沒有從政府收過捐款，美國國家民主基金會從來沒有嘗試干預人權監察，做些甚麼或如何運作」云云，簡單而言，就係不論佢嘅英國政客身份，定係佢有份創立曾接受美國組織捐款嘅人權監察，夏博義似乎都認為唔足以要佢辭去大律師公會一職。

老實講，夏博義係咪英國自由民主黨嘅「活躍成員」，基本上大家都無從得知，囍雨比較關心嘅部分係，喺佢做大律師公會主席並作出建議甚至決定時，佢所代表嘅係香港大律師公會嘅利益，係香港嘅利益，定係代表緊英國政黨嘅利益？大家都無從得知。至於有關人權監察以至人權監察收過「美國國家民主基金會」捐款嘅問題，夏博義稱「美國國家民主基金會」無嘗試干預過人權監察，但如果人權監察做嘅嘢唔符合「美國國家民主基金會」以至美國嘅利益，人權監察又點攞人哋捐款？進一步講，收「美國國家民主基金會」捐款唔等於收「政府」或者美國政府錢，但據報「美國國家民主基金會」嘅主要資金來源係美國國會撥款，咁係咪同美國政府以至國會關係密切先？人權監察又算唔算係勾結外國勢力？

支持西藏「自決」 最不能接受

除咗夏博義嘅英國政客身份，囍雨認為夏博義支持西藏「自決」嘅立場同樣令人難以接受，夏博義喺媒體訪問中表示自己身為英國人，而同時作為一名香港人，但一個正常香港人，會有疑似分裂中國的言行？一個支持西藏「自決」嘅政客，某程度上就有分離思想，仲點適合做香港大律師公會主席？

據夏博義接受訪問所講，大律師公會正就《港區國安法》條文進行研究，唔排除會向律政司提交意見，囍雨仲想問一句，中央訂立《港區國安法》，大律師公會（或者夏博義本人）想修訂，到底係以法論法，定係仲有其他目的？夏博義之前話想修改部分條文，當中有冇包括英國政黨嘅考量或者影響？講真，夏博義實在有太多「身份」，當佢公開發表意見嘅時候，囍雨實在分唔清楚佢「在代表誰」！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk