廣男呢兩日繼續關注有關港人移民英國嘅新聞，睇到有報道引述「消息人士」話，已經有近5千名港人申請BNO簽證，其中大概一半人已經以「Leave Outside The Rules」 方式抵達英國；末代港督彭定康更開腔聲稱，「相信大量香港人才抵英後會受到歡迎」。廣男其實有啲好奇，一向歧視港人、唔中意香港移民嘅英國，如今「笑臉迎人」，究竟係睇中港人邊一方面呢？要人力？要錢財？抑或「以上皆是」？
最實際 都係錢？
據報根據英國當局嘅預計，未來5年將會有30萬港人移居英國；而彭定康就宣稱，「我肯定很多來自香港的人才抵達英國後會受歡迎，他們亦會為英國作出巨大貢獻」。不過大家要留意下，彭定康嘅講法，唔係話歡迎香港人去英國「享用福利」，而係歡迎「人才為英國作出貢獻」。呢個世界，貢獻，有好多種；最實際，梗係錢喇！
大家諗下，如果一批批有錢人喺香港賣車賣樓，然後轉去依家經濟不景嘅英國買車買樓、刺激消費，對英國庫房嚟講，已經係好大一筆收入。再者，如果有香港人才好有信心或者已經喺英國搵到一份高薪厚職，咁廣男要恭喜你喇！不過同時要恭喜埋英國政府，因為你好大一部分收入，將會係用嚟交稅俾英國。廣男舊年睇過一篇報道，一位「經驗人士」幫大家計過條數（以港元計）：假設你喺香港年薪廿四萬，以香港嘅稅率計算，你需要交嘅稅大約係8,400元（仲未計一系列免稅額），但以英國嘅稅率計算，你需要交嘅稅大約係24,000元，除此之外，仲要繳付大約18,000元「國家保險費」。
需要港人貢獻勞動力？
具體銀碼係幾多，大家可以自己再計，不過實情就係，習慣咗低稅制嘅香港人要有心理準備，有啲「錢」，你喺香港「冇乜感覺」，但去到英國，係「另一個世界」！咁有冇辦法唔交咁多稅？有嘅，唔好「搵咁多」，咪唔使「交咁多」囉，之但係，你以為喺英國，啲「基層工作」咁容易搵？之前有報道就提及，一名港人移民喺當地一間中餐廳，親眼「見證」多份應徵「廚房助理」一職嘅簡歷，居然係來自有碩士、博士資歷嘅港人。廣男就認為，英國「歡迎」港人，唔係因為有大把高薪厚職等住你，而係需要有人去做果啲英國人唔願做、不屑做嘅工作，但咁樣，又係咪你心目中嘅「移民生活」？
廣男都係果句，條路點揀，自己決定，不過同時要記住，後果亦都要自負。近日，大家已經睇過唔少去到英國之後「中伏」嘅故事，如果有人要繼續「前仆後繼」，廣男好歡迎呢班人日後可以同大家分享下喺英國嘅「辛酸經歷」，令其他準備移民嘅人，多一份「參考」！
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論