「有風骨 絕不為五斗米低頭」、「真的漢子」、「守護良知」… 已解散嘅新公務員工會主席顏武周公布其離職消息，好多人喺社交帖文上留言力挺佢，但囍雨想講，支持者應該睇清楚顏武周係點諗，先再決定係咪要讚佢「有風骨」！例如顏武周喺感言提到「簽署聲明確實是其中一個因素，但更為重要是我認為在現時的崗位能發揮的空間已經相當有限，因此並無必要繼續自欺欺人地留在政府」，即係話，更重要原因，應該係顏武周喺工作發展唔好，無晒「錢途」先走，啲人盛讚顏武周，係咪想讚佢夠「世界仔」呢？

由顏武周一段說話，其實可以理解為要簽署聲明係一個因素，但更重要係佢喺政府已經無前途。據報喺去年六月，當時署任一級助理勞工事務主任嘅顏武周被取消署任，「降回」二級助理勞工事務主任，即係無得升職兼要降返職，而佢去年想搞「罷工公投」，更有媒體話政府要紀律調查調查佢；將佢喺政府嘅狀況加埋佢段「離職感言」一併考慮，好可能係「我無得升職，無得發展落去，不如辭職算啦」。所以，與其話顏武周「守護良知」，不如話佢勢利，見勢色唔對就閃！

入政府 為抗爭？

喺顏武周嘅「離職感言」，囍雨仲留意到顏武周有提到關於2019年反修例運動一事，稱「就工會解散一事，或是整場運動去看，我理解及明白不少同路人感到可惜，甚至有部分人認為2019年期間的抗爭手法沒有效用，因為最終的勝利沒有到來，然而我的看法是剛剛相反」云云，呢度又產生另一個問題，如果有人入政府，係一邊想升職加薪，一邊又想抗爭反政府，咁呢種人仲係咪適合留喺政府呢？

公務員係公職人員，係代表政府服務市民嘅公僕，如果有人「一邊為錢，一邊為反」而加入政府，可能會影響到政府嘅運作甚至市民利益，咁顏武周唔好提宣誓問題，一早就應該離開政府啦！其實，唔好講《港區國安法》嘅實施，亦唔需要講公務員宣誓，有政府官員早喺2004年已經公開講過，公務員政治中立，係包括「公務員應對在任的行政長官和主要官員盡忠」、「在政府作出決定後，不論個人立場如何，公務員應全力支持，把決定付諸實行」等等，就算以當時標準去睇，顏武周等人根本無公務員應有操守，佢唔辭職，都應該被警告甚至解僱先啱！

顏武周「同路人」都應該要走？

顏武周，只係其中一個「領着公帑反政府」嘅公務員或前公務員，隨住公務員需要宣誓或簽署聲明效忠特區，更多顏武周「同路人」都理應離開政府；至於特區政府，既然公務員要效忠特區，而咁多公務員根本無效忠甚至係「作反」，政府應該大刀闊斧，好好整治公務員隊伍，令其成為真正為香港、為市民服務嘅管治團隊。 

圖片來源：RTHK、新公務員工會Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk