喺前年開始嘅反修例運動期間，反對派人士包括民主黨成員「係威係勢」，甚至稱自己贏緊「5比0」，但時移勢易，當《港區國安法》實施後，反對派即刻縮嘅縮、走嘅走，涉嫌違法嘅，就一個又一個被送上法庭受審。最近，民主黨副主席梁翊婷接受傳媒訪問時透露，目前民主黨有多名成員「官司纏身」，估計法律費用達2,500萬元，所以未來將籌款支援相關開支。對於民主黨要籌錢打官司，其實問題好簡單，民主黨自己要抗爭或者「違法達義」，依家俾人拉、檢控可以話係求仁得仁，點解要市民幫你哋埋單呢？

30名成員有「官司」

據報，民主黨有30名成員有官司喺身，其中副主席林卓廷有七宗，前主席胡志偉有六宗，各人合計共涉逾50宗案件，估計法律費用高達2,500萬元；如果佢哋當中有人保釋被拒，會有額外上訴開支，「埋單」金額更加隨時係天文數字。2,500萬元以至更多錢，絕對係天文數字，民主黨想市民找數，恕廣男坦白講句，根本就係「搵笨」！

不論係反對派政客、抗爭者以至係民主黨成員，自己涉及違法，點解要市民埋單呢？廣男必須指出，自2013年開始，唔同嘅社會人士已經勸過反對派無數次唔好「違法達義」，但反對派包括民主黨人「堅持抗爭」，依家被捕甚至被檢控，係咪應該「自己條數自己找」呢？如果因為民主黨人「抗爭」市民就要幫佢哋俾法律費用，咁如果佢哋要坐監，支持者又使唔使養埋佢哋屋企人？

林卓廷高價賣樓 豈會無錢？

更重要嘅係，民主黨成員係咪無錢打官司呢？睇返前排報道，林卓廷賣樓，好似以超過1,200萬元成交喎！至於胡志偉，做咗議員咁多年，如果話佢無錢打官司，廣男就唔係好信囉！講開又講，既然林卓廷賣樓都賺咗咁多錢，其實佢可以捐啲錢出嚟「幫兄弟」，咁民主黨就唔使籌咁多錢啦！

仲有一個方法，就係反對派有專為佢哋打官司開支而設嘅「612基金」，民主黨係咪可以申請「基金」呢？「自己人」申請，又會唔會更快獲批？其實，如果當初無涉嫌犯法，依家又使咩打官司呢？一切因果，皆自招也！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk