關於香港大律師公會新任主席夏博義嘅爭議，連日嚟繼續發酵。繼發表「修改國安法」論，被揭發曾經撰文宣揚「西藏自決」、涉支持「藏獨」之後，夏博義又被踢爆，佢於舊年6月2日喺Twitter發表嘅一則帖文，涉支持「港獨」。呢篇帖文嘅大概意思係話，喺香港，有相當一部分人「支持（香港）獨立」，夏博義就認為喺一個自由社會，「他們有權利這樣表示，只要是和平的就可以了」。即係話，一個大律師公會嘅主席，認同香港人「和平地搞港獨」？

認同分裂國家的「中間派」？

如果大家同囍雨一樣，一路有緊貼住有關夏博義嘅新聞，可能會有一種感覺，就係呢啲越揭越多嘅爭議事件，好似一塊塊拼圖咁，逐漸拼湊出夏博義呢位有英國自由民主黨員背景、二流政客嘅「全貌」。姑且先撇開夏博義嘅政黨聯繫、做過英國牛津市議員呢啲身份，外界依家對佢嘅認知，包括佢被奉為「人權大狀」，係「香港人權監察」嘅創會主席，而該組織又被指由美國政府給予資助；除咗早年已經開始宣揚「西藏自決」，喺香港反修例運動期間又疑似乎表態支持「港獨」；《國安法》喺香港生效之後，佢又指摘《國安法》「限制香港人權」、令「某些人凌駕於法律之上」、破壞法治云云，囍雨嘅問題好簡單：一個秉持如此政治立場嘅人，係咪適合、可唔可以——喺中華人民共和國嘅香港特區，做大律師公會嘅主席呢？

猶記得，夏博義新官剛上任時，就向媒體表態話自己係「中間派」，老實講，如果係私人角度，你係咩「派」都與人無關；但既然依家夏博義身負「香港大律師公會主席」呢個職銜，作為代表香港司法界嘅重要人物之一，佢有冇表態支持過「一國兩制」？有冇反對過「分裂中國」？囍雨就好似未曾聽過。講開又講，夏博義時至呢一刻又有冇明確表態反對過「藏獨、港獨」？囍雨同樣未聽過！夏博義係咪應該同大家講清講楚呢？呢個係事關國家安全、主權問題，唔係小事！

職銜在身 就不是「個人意見」這麼簡單！

更加重要嘅係，囍雨認為從大律師公會角度，對於夏博義嘅政治立場，唔可以一句「個人意見」就輕輕帶過、算數了事，而係要認清，大律師公會唔可以有一個咁樣嘅公會主席！既然大律師公會之前已經發聲明強調自己唔係「政治組織」、會維護《基本法》，咁又點可以俾一個連《基本法》第一條、開宗明義強調香港係「中華人民共和國不可分離的部分」都唔認同嘅人做主席？再講得直接啲，捍衛法治、擁護《基本法》，就係要旗幟鮮明反對「港獨」、反對分裂國家！更何況，何謂「個人意見」？原來夏博義作為主席，唔係帶領公會、代表公會？社會大眾又點界定佢邊啲係「個人意見」？再推到極致啲，其他專業團體嘅代表、乃至政府官員、特首，又可唔可以憑一句「個人意見」就為所欲為？

囍雨都係果句，事到如今，為免連累大律師公會嘅專業性，夏博義應該馬上主動辭職；公會方面亦都唔可以再拖落去，應該明確表態及交代如何處理事件，否則爭議越揭越多，後果亦都會越嚟越難以收拾！

圖片來源：大律師公會、RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk