香港大律師公會新任主席夏博義嘅「西藏自決論」曝光之後，喺社會引起軒然大波，加埋佢嘅英國政黨背景、冇申報過嘅英國政客身份，囍雨認為大家必須正視嘅問題係，如果任由佢繼續執掌香港嘅大律師專業團體、繼續喺香港司法界擁有舉足輕重嘅地位，究竟會有咩後果？大律師公會真係仲可以保持中立？
看清夏博義的立場
囍雨搵到一篇夏博義於2008年8月、發表喺香港大學法律學院網站上嘅論文（中文版），題為《西藏是否應有民族自決的權利？》，喺度想原文照錄其中部分表述俾大家一齊研究下，夏博義此文想表達嘅觀點，係咪淨係探討「西藏自決」咁簡單？例如：
- 即使從歷史角度中國對西藏的主權的主張比實際情况更强，也不能作為入侵一個獨立國家的依據。
- 中國經常以「落後」這一論據來支持其佔領西藏，也是進一步說明那是一個典型的殖民主義佔領。
- 若民族自决這一權利還有任何意義的話，則必須適用於西藏。
- 西藏是一個處於外來軍事統治下的國家。
- 西藏人民處於「異族奴役、統治和剝削」之下。
- 一連串的嚴酷鎮壓、中國統治下藏人的二等公民身份，以及西藏作爲一個國家的地位，都比科索沃的情况更明確。
- 除非中國政府容許真正的自治，西藏的自决就意味著獨立。
按照囍雨嘅理解，呢篇所謂論文，雖然標題係「設問」，但夏博義想呈現嘅觀點就係：「西藏是中國的一部分」呢種說法從歷史角度而言「存在問題」；中國同西藏係「入侵與被入侵、殖民與被殖民」嘅關係，甚至中國對藏民「奴役、統治、剝削」；而西藏係一個「獨立國家」、絕對有「民族自決」嘅權利。
再進一步，如果呢個理解冇錯，咁可唔可以認為，夏博義除咗主張「西藏自決有理」之外，喺佢嘅立場裡面仲包括認同「藏獨」、甚至支持喺某啲「特定情況」下，應該將西藏從中國「分離出去」？所以囍雨質疑，夏博義呢篇「論文」，係咪以「學術」包裝嘅政治立場宣示呢？而且直到呢一刻，未見夏博義撤回文章，或者明確表示「反對藏獨」、「支持中國維護主權、領土完整」等言論。
這是國家安全、主權問題！
然而今時今日，夏博義呢位英國牛津市議員出身（已辭職）、極具政治立場嘅英國人，竟然喺冇競爭對手之下，成為咗代表香港大律師專業團體嘅公會主席，囍雨首先要質疑，喺佢帶領之下，大律師公會如何確保「保持中立」？可能有人會覺得，由一個英國政客出任香港司法界重要代表之一，冇問題；做過英國嘅「市議員」，亦都可以接受，但囍雨要強調嘅係，無論係夏博義提出「修改國安法」，抑或宣揚「西藏自決」論，所牽涉嘅係國家嘅安全問題、主權問題，呢啲絕對唔係「小事」，唔容許有半點含糊！
事到如今，關於夏博義嘅爭議越鬧越大，囍雨認為，未免影響大律師公會嘅專業性，夏博義應該馬上辭職！
原圖：rthk、夏博義文章截圖
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論