《生果報》美化抗爭者嘅新聞，相信大家都睇過或聽過唔少，例如佢哋會將暴徒形容為「衝衝子」，將縱火暴徒形容為「火魔法師」，名目林林總總，總會俾人感覺一啲破壞分子係香港嘅「英雄」。近日，一篇《生果報》專訪再次吸引到廣男嘅注意，話說一個化名「錘佬」嘅19歲港青，因為擔心被「秋後算帳」，所以先獨自到英國，再取道墨西哥偷渡入境美國，尋求政治庇護。「錘佬」接受《生果報》專訪時，仲指母親曾引用中國近代思想家胡適嘅名言去鼓勵佢。故事講得精彩，但廣男想問，呢位「走佬」青年，實則喺香港做過啲乜，點解「非走不可」？

看新聞 要看「細節」

就咁《生果報》嘅專訪，好容易予人「青年受壓，被逼流亡」嘅感覺，廣男留意到，呢位青年稱自己曾「全身投入反送中這場運動，前年8月一次在旺角的示威活動中，更以數學書做避彈衣，卻被警察一枚催淚彈擊中，像是中了一記重拳；之後又遭警察打爆肝，在私家醫院留醫一周；在，『中大保衞戰』中，持鐵錘『鎮守』二號橋，並在『理大圍城戰』留守校園3日後自首被捕」。問題嚟喇，佢喺呢啲事件，到底擔當咩角色，實際做過啲咩呢？

如果講參與示威活動，如果三人或多於三人集結埋一齊，作出擾亂秩序嘅行為，咁呢名青年可能觸犯到非法集結或相關罪行，如果非法集結又破壞社會安寧，又可能涉及到暴動罪行。至於所謂「中大保衛戰」或者「理大圍城戰」，基本上兩場活動都係一場暴徒佔領大學校園，繼而向警方發動攻擊嘅暴力活動，呢位故事主角，喺當中又扮演咩角色、做過啲咩？廣男好奇，既然《生果報》同人做越洋專訪，點解唔探究、報道下該名青年實際喺唔同示威現場做過咩事？有冇暴力對待過警方或他人呢？

美化抗爭者 絕不可取也

據廣男所理解，呢位青年最後應該係無被警方檢控，只係「驚有事」所以「走咗先」，睇完成個報道，廣男最大嘅感觸，在於不論係故事主角或者其他香港青年，佢哋本身就唔駛走或者挺而走險，就係因為反對派政客以至《生果報》等媒體經常宣揚抗爭訊息、「叫人上街」，結果無數青年被捕，亦有唔少青年「走佬」，可能一世都返唔到香港。

其實，《生果報》登出呢啲故事，本質就係「青年違法達義，所以棄保潛逃，繼而前程盡毁」；而《生果報》講啲唔講啲，亦似係美化緊唔同嘅「抗爭故事」，予人錯覺反政府、反中央以至走上街頭先係「正確的事」。青年嘅責任，係在於讀好書，繼而步入社會工作，貢獻社會以至國家，《生果報》以至反對派如果想將政治責任套在青年身上，請你哋先叫自己嘅仔女、子侄上街！ 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk