新任大律師公會主席夏博義資深大律師（Paul Harris），原來唔係「一般人」，而係一名英國政客，英國媒體《牛津郵報》近日有報道指，夏博義上月宣布即時辭任英國牛津市議員一職，原因係佢喺香港工作增加。據報，夏博義為英國自由民主黨一員，並於2018年獲選為牛津市議員。問題嚟喇，作為香港嘅大律師公會主席，其另一身份竟然係一名英國政客兼市議員，咁佢到底係代表英國嘅利益，還是代表香港嘅利益呢？

為港服務的英國政客

對於夏博義出任大律師公會主席，囍雨相信反對派唔會有咩反對聲音，喺呢度，囍雨想同大家重溫一單2008年初嘅新聞，話說時任大律師公會主席袁國強出任廣東省政協觸發咗一場「倒袁」風波，有不滿袁國強嘅資深大律師得悉袁國強無意辭職後，計劃向佢「發炮」，甚至唔排除召開緊急會員大會，逼佢落台。簡單嚟講，就係因為袁國強接受政協呢份公職，有人要佢「落台」唔想佢做大律師公會主席。

當時袁國強所接受嘅，只係自己國家、即內地委任嘅公職，而據袁國強所講，政協屬顧問性質，委員可以自由發表意見，唔會同大律師公會主席嘅身份出現衝突；啲人都要要求袁國強辭去大律師公會一職，咁今次夏博義作為一個英國政客，又係咪適合做香港嘅大律師公會主席呢？

代表「誰」要求修改《國安法》？

夏博義近期「人氣急升」，因為佢身為大律師公會主席，上任之初就提出想叫政府修改部分《港區國安法》條文，令佢成為各界嘅批評對象；依家睇返件事，佢原來係英國政客，咁就有問題喇，到底想修改《國安法》，係夏博義本人嘅睇法，定係呢番意見係代表咗英國政界嘅聲音？作為香港嘅大律師公會主席，竟然質疑由中央政府出手制定嘅法律，成件事又會唔會有古怪呢？仲有一個重要問題，就係夏博義參選或出任大律師公會主席前，有冇申報過佢同英國政黨關係，以至佢當時可能仲係英國牛津市議員呢？

之前英國御用大狀David Perry本來嚟香港代表律政司打官司，但就俾英國政要等「狙擊」，而夏博義似乎就無強烈譴責過英國政府或政要；諗返轉頭，係咪因為夏博義本身都代表住英國嘅利益，所以任由英國干預香港司法？其實，事情可以好簡單處理，夏博義既然有「不同身份」，咁就應該辭去大律師公會一職；香港，唔需要一個外國政客領導嘅大律師公會。 

原圖：oxonlibdems.uk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk