特首喺施政報告警剔學生刊物《學苑》嘅港獨主張，一石激起千重浪，唔少人即刻撲出嚟話特首打壓言論自由、干預學術自由。所謂假話聽一百次都變真話，驟眼睇學生出版、特首警剔嘅表證，特首好似真係有干預學術自由喎！不過諗深一層，有人提倡「港獨」呢啲違法、違憲、違反歷史、極危險嘅主張，本身已經肯定唔係處於學術討論嘅範圍，即使退一萬步來說，就當你係「學術討論」，但我哋一定要搞清楚學術自由係咩一回事先？係「學術自由」真係被干預吖，定係班政客、學生先係打擊自由既真兇呢？

廣男才疏學淺，總算讀過大學，又進修讀咗個碩士，對學術自由或多或少都有啲個人見解，今日就獻醜同大家分享下意見。學術自由，廣男理解係有人提出一套講法、主張、論述或者理論既時候，其他人可以發表回應，指正佢得，批評佢又得，批判佢都得，然後提出者可以回應各種批判，來來回回，形成一種討論既氣氛。

回應、批判或者警剔，廣男個人認為都唔係干預學術自由既表現；相反，如果特首、政府唔畀學生出版刊物或者以言入罪，咁就真係干預學術自由喇！學生有發表言論既自由，其他一樣有批判佢既自由，如果有你講、無人講，咁干預學術自由既係邊個呢？

廣男其實多年前喺上某學科導修科既時候，教授鼓勵同學有任何問題都可以勇敢提出、促進討論，其中一句說話廣男到而家依然印象深刻，大概意思就係「學術討論係無尷尬嘅」，即係話有問題就問，想批評就批評，如果討論學術唔可以你一言、我一語咁暢所欲言，試問真理又如何越辯越明呢？就算身處喺紛亂嘅社會，言論自由都依然係香港嘅核心價值，就算係特首一樣有呢種自由。同學仔，你有自由是不爭事實，但其他人又何嘗沒有批判你嘅自由呢？

原圖：RTHK