北京冬奧噚日（2月4日）進入倒數一年階段，所有籌備工作都喺度有序進行緊；一年之後，疫情對北京冬奧順利舉辦會有幾大影響，依家未知，不過現時就出現咗另外一啲「雜音」。據報美國新任總統拜登嘅顧問，正試圖以「中國鎮壓新疆少數民族」為由，試圖游說歐洲國家聯合抵制北京冬奧。美國政客此舉，明顯係將政治摻入體育！一個關乎全球嘅奧運會，依家都要被政客騎劫、成為政治籌碼？
廣男留意到，除咗拜登嘅顧問外，據報美國政府甚至打算制定法案，禁止美國公民參加北京冬奧；另外，仲有7名美國共和黨參議員日前向國會參議院提交決議案，以「中國侵犯人權及打壓香港人」為由，促請國際奧委會重新安排明年冬季奧運會嘅主辦權，要求喺中國以外嘅地方舉行。
有尊重過奧運精神嗎？
廣男想講，政客政治上腦、只顧一己政治立場，似乎唔知道現代奧林匹克精神第一句話，就係「每一個人都應享有從事體育運動的可能性」！大家諗下，如果美國政府真係「制定法案」禁止美國民眾參加奧運，有冇尊重過全人類共同遵從嘅奧運精神？政客可能亦都唔明白，大家所熟悉嘅奧運五環，之所以「環環相連、緊緊相扣」，最重要嘅深意就係象徵全世界不論種族、膚色，都和平、友誼、團結。如果政治問題，攞體育嚟當籌碼，甚至呼籲其他國家歸邊玩抵制，咁奧運豈非要「拆骨」？和平、團結從何談起？
廣男唔知道，美國政客喺打定上述「鬼主意」之前有冇諗過，今時今日，你叫人抵制、反對喺中國舉辦奧運，咁日後如果輪到自己舉辦奧運，中國又係咪應該反制？首先，美國政客借所謂「新疆問題、香港問題」以至人權問題發難，根本就係一貫嘅政治攻訐；再者，講到人權、自由，早前美國國會山莊暴動，有執法人員「槍殺」示威者，舊年亦都試過有黑人平民被警察「跪頸致死」，而且美國嘅種族歧視問題長年都相當嚴重，咁以後係咪應該唔好俾美國辦奧運？全世界又係咪應該抵制美國？
不放過一切打壓中國的機會？
唔講唔知，如果明年冬奧順利喺中國成功舉辦，北京將會成為史上首個先後舉辦夏季奧運會同冬季奧運會嘅城市。廣男認為美國政客言行背後反映一個問題，就係一切有可能展現中國國力、成就嘅事件、活動、場合，都可能隨時成為外國政客、尤其係美國政客攻訐、打壓嘅目標。如果，連一個全世界參與嘅體育盛事都被政治化，廣男想講，世上肯定冇贏家！體育，從來冇分國界；奧運精神，更加係全人類共同追求嘅目標，至於政治，留返俾政客自己去玩吧！
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論