最近，關於用BNO簽證移居英國嘅問題鬧得沸沸揚揚，有人認為如果選擇以BNO簽證移英，就唔應該再擁有中國籍甚至香港永久居民身份；亦有意見覺得呢啲係「個人選擇」，唔應該「加辣」干預，而民主黨前主席劉慧卿，所抱持嘅正係後者嘅意見，佢聲稱「希望中國政府能冷靜、心平氣和應對，讓香港人自行作選擇，不要作加辣措施」。囍雨質疑，所謂有權利必有義務，如果人已經選擇離開香港，又憑咩要求繼續享有權利，包括永久居民身份以至喺香港嘅福利呢？

不可佔兩家便宜

對於劉慧卿嘅說法，恕囍雨講得白啲，根本就係「又要走，又要留住著數」，成件事嘅道理其實好簡單，如果有人要以BNO簽證形式移居英國，即係放棄香港作為「家」或者永久居住地，既然人已經要走，點解仲要保留香港嘅永久居民身份呢？更何況，中國包括香港理應係唔承認雙重國籍嘅，想「佔兩家便宜」，囍雨覺得不太可能。

再討論落去，當然就係公平嘅問題，任何文明社會，喺作出或者不作出某啲決策時，都必先要考慮到公平問題，例如喺經濟問題上，如果政府庫房「開倉」，可唔可以免去公屋基層戶租金，但完全唔提供惠及中產嘅措施（如退稅）呢？答案係唔可以嘅，因為咁樣「唔公平」。同理，如果有人選擇移居英國，但可以保留一切權利，而對於其他留喺香港、為香港付出嘅市民，都只係享有同等嘅權利，得唔得呢？當然亦唔得，因為唔公平！

有權利必有義務

透過以上例子，其實囍雨想講嘅，就係有權利必有義務，作為香港市民，不論係交稅、用工作等貢獻社會，係義務，有履行義務，就有包括享受福利嘅權利；而選擇咗移居英國嘅人，既然無履行義務，當然亦唔可以諗住自己有咩權利。想「有權利而無義務」？好抱歉，呢個世界無咁便宜嘅事，如果香港任由人士喺香港「自出自入」，而且係透過為人垢病嘅BNO簽證去移民，咁香港就唔係一個家，而係一間「酒店」。

近日，社會紛紛傳出中方可能會再就BNO簽證作出反制措施，囍雨喺度要提醒「想走嘅人」，今日英國收留你，當然係有利佢哋嘅國家利益，因為果邊經濟等環境都唔係好；有一樣嘢可以肯定嘅，就係如果有一日英國因為政治理由唔再收留BNO人士，而呢班人又失去咗香港永久居民身份嘅話，到時兩頭唔到岸，咁點算好？為前途打算，會唔會變咗賠掉自己同家人嘅前程？考慮呢啲問題，真係要慎之又慎。 

圖片來源：劉慧卿Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk