講起選大學學生會，大家會諗起嘅，應該係一班志同道合嘅同學，參選上莊，然後為同學服務；但時移勢易，喺反修例風波之後，參選學生會就有一重新嘅「政治意義」。有傳媒報道指，中文大學有12人打住「本土」旗號、懷着被捕嘅心理準備同對家人嘅愧疚「披甲上陣」，呢個取名「朔夜」嘅候選內閣，其候選會長林睿晞揚言「輕則警告、重則停學甚至被捕，他們12人在『埋班』後都已做好心理準備」、「望加強港人的本土意識、延續抗爭意志」。其實，依家係選學生會啫，呢種預咗俾人拉嘅心態，係咪佢哋同時預示咗自己會搞事先？
學生代表「豁出去」
除咗候選會長一番「豪情壯語」外，候選副會長羅子維亦稱，若堅持民主自由等價值而被「羅織」罪名，佢哋「義不容辭」，表示「為咗我哋要實踐到嘅嘢，我覺得都係值得」，更稱其家人都要「承擔」一啲風險，意指家人亦隨時被「起底」。對於一群學生代表或「準」學生代表擺出一副「隨時戰死」嘅姿態，廣男覺得根本不必要，除非佢哋係有心生事，繼而預備「犧牲」。
不論呢班學生代表們說得如何「慷慨激昂」，廣男首先要指出，如果學生代表唔生事、唔犯法，係無需要什麼「預咗俾人拉」或「已做好心理準備」；作為學生代表，最重要嘅唔係抗爭，而係為同學服務。前者（抗爭）擺姿態多於實際，而且可能惹禍上身；後者先至係學生代表應做、該做嘅事。關於呢一點，唔止係中大嘅學生，其他大學嘅學生都應該清楚明白。
校方不會打壓 但校方須做好保安
廣男從傳媒報道仲留意到，呢班學生當中有人因為同保安起衝突而被處分。廣男想講，佢哋係作為大學學生，以至可能將成為大學嘅學生代表都好，中大之所以加強保安，並唔係要刁難學生們，而係因為喺之前嘅反修例風波中，中大確實係被佔領過而且成為「戰場」。留難保安無意思，諗住大學仲係以前咁「無王管」，亦係不可能。
有冇人想年輕人被捕、被檢控？廣男唔相信有常理人會有呢種諗法，但如果學生、大學生以身試法，執法部門就有必要執法；如果係喺校內犯校規，校方亦要照校規行事。反修例風波已成過去，市民要向前望，大學生都要向前望，為自己、為大學以至為社會都好，說到底，請放低「抗爭者」嘅心態。
原圖：中大候選學生會「朔夜」fb
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論