政客最大嘅特質係咩？答案係政客會依據形勢、政治利益而隨時轉軚，務求將自己嘅政治利益甚至金錢利益「最大化」！最近，有關區議員宣誓問題引起社會廣泛討論，民主黨副主席、北區區議員林卓廷就公開表示如果宣誓內容純綷跟立法會誓詞，佢睇唔到點解唔參與宣誓，仲話政治立場係可以轉變嘅，以前年輕人要「自決」，依家改變政治立場思想係「可以」嘅。其實林卓廷一大堆道理，講到底，都係為咗區議員份糧？反政府重唔重要？重要，但出糧可能更重要！
請大家看看《國安法》
林卓廷撐宣誓，被人質疑極可能出於「金錢考量」，所以有人話佢「跪低」其實一啲唔出奇；囍雨留意到，佢另一番公開言論，更加令攬炒派支持者覺得出奇，例如講到《港區國安法》，佢就話喺一個咁艱難、多變嘅環境，一定要冷靜看清形勢做嘢，建議香港人要睇睇《國安法》，因為唔理係同意或者唔同意，法例已經喺度。唔知林卓廷呢番表述，算唔算係「覺今日是而昨非」呢？
自從攬炒派立法會議員「總辭」後，攬炒派政客包括林卓廷，可以話係斷咗自己每年四百萬薪津嘅一大條「財路」，幸好，林卓廷除咗當時係立法會議員，佢仲身兼北區區議員，每個月剩係計區議員薪金都有三萬幾元；如果唔願意宣誓，令到自己連區議員每年逾一百萬元薪津都失去，咁咪隨時變成「雙失中年」？所以林卓廷撐宣誓，係真心擁護《基本法》、效忠特區，定係「為咗錢」，相信大家都心裡有數。
至於《國安法》嘅問題，雖然林卓廷似乎係「轉軚」叫人睇《國安法》，但囍雨覺得佢作為攬炒派一員，依家先叫人睇《國安法》，太遲喇！經歷一年多嘅黑暴運動，中央為香港制定《國安法》，一定唔會係無牙老虎，林卓廷等人喺《國安法》生效後仲搞咩攬炒派「初選」、參與戴耀廷等人嘅「奪權大計」，自己俾警方拉埋先叫人睇《國安法》，林卓廷似乎亦過分欠缺政治觸覺。
民主黨怕滅黨？
林卓廷作為民主黨副主席，佢公開「支持」區議員宣誓，其實仲有一個深層次考慮。依家民主黨雖然已經無晒立法會議員，但仲有近90個區議員，可以話係區議會當中嘅一大勢力，如果民主黨區議員都拒絕宣誓，甚至被DQ，咁民主黨咪會真正「滅黨」？喺政治利益、金錢利益面前，民主黨包括林卓廷可以話係「識時務者為俊傑」；但囍雨用另一角度睇呢件事，民主黨依家先至認清形勢，似乎亦有啲遲。不過，「遲到好過無到」，但願民主黨以後循規蹈矩，做一個對香港有貢獻嘅忠誠反對派！
原圖：中新社
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論