「成日要錢多，（錢錢錢錢），乾水乜都喎」… 有人話，朋友甚至「戰友」之所以會反面，一係為錢，一係為權，一係為異性，攬炒派人物之間有冇為「異性反目」，廣男唔知，但為錢反目呢，就肯定有。早前，有「攬炒巴」之稱嘅劉祖廸，就拍片同「重光團隊」割席，仲稱「我唔稀罕你哋嘅錢」，當中嘅恩怨情仇，大抵係佢哋「分家」嘅時候，就住資金分配產生衝突，搞到佢哋由「同路人」變成「真仇人」。廣男真心好奇，佢哋唔係為理念、攬炒香港而合作嘅咩？原來喺金錢面前，啲關係可以咁脆弱？
恩恩怨怨 離不開錢
對於「攬炒巴」劉祖廸以及「重光團隊」嘅恩恩怨怨，簡單啲講，就係劉祖迪想同團隊「分家」，並提出由民間投票決定之前眾籌所得資金嘅分配，之後有一半人認為要「五五對分」，但「團隊」就唔贊成，發聲明指眾籌資金受法律約束，劉祖迪要動用眾籌資金就要按「制度」申請審核云云，「團隊」亦由本來嘅攬炒團隊更名為「重光團隊」，表示仍會「公平公正」使用資金。所以劉祖迪拍片割席，又話唔稀罕對方啲錢，大概就係咁嘅緣故。
對於呢件事，廣男首先要講，攬炒派所謂嘅「齊上齊落」、「不割席」，根本只係政治口號，只要一涉及到利益包括錢，好明顯係「同路人」都無面俾；呢件事，唔係剩係反映「攬炒巴」同佢之前「團隊」嘅衝突，而係反映成個攬炒派嘅狀況。最簡單嘅兩個例子，就係攬炒派之前為咗所謂嘅「初選」拗餐死；之後因為議員延任嘅問題又再互相攻擊過，一時有人提出要時任立法會議員「分配」出資源包括人工，而時任議員又話自己「有被捕風險」唔會咁做。表面上，大家為理念，實際上，大家係為政治利益同金錢利益。
攬炒派支持者要清醒
所以，如果攬炒派支持者以為政客們係為理念，廣男真係請大家「睇真啲」，喺佢哋當中，當時做緊議員嘅，諗緊嘅係點樣保住利益，所以之前遲遲都唔肯辭任議員；至於未「上位」嘅，就諗住點樣上位做議員；潛逃咗去外國嘅，就諗點樣籌錢。如果仲打算支持佢哋，咁係個人選擇，但如果為咗政客們提出嘅「理念」而違法達義，咁只會成為政客們嘅「人血饅頭」，各位尤其係年輕人，真係要清醒啲！
原圖：劉祖廸Facebook
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論