「住得一日響大陸監獄都嫌多同冤枉」、「好明顯特區政府配合中共進行全面打壓，司法剝奪、司法黑暗，就係咁樣」、「佢哋所在的監獄衛生及人際處事情況都也可說是很差」、「難以想像12港人喺中國式審訊之下遭受啲咩待遇」…

自從「12瞞逃」舊年畏罪潛逃事敗、因為偷越邊境喺內地被拘捕、審判、服刑以嚟，類似上述嘅種種針對內地司法、內地監獄嘅攻訐、抹黑，就幾乎一直未曾停止過；依家「12瞞逃」之中，有10人喺深圳嘅監獄服刑緊（另兩名未成年人士早前已移送香港警方），佢哋所經歷個嘅真實情況又係點？係咪真係過住有如黃絲黑暴口中所描繪嘅「黑獄生活」？

看看《生果報》的報道

既然「難以想像」，咁就請唔好憑空捏造，不如睇下真實報道。日前，三名「12瞞逃」家屬嘅其中二人，順利喺深圳鹽田看守所探望咗自己仔女，囍雨喺度幫大家摘錄少少相關報道：

李子賢母親與兒子在看守所面談一小時，而非以視像形式對話。李母形容兒子精神好好，對答如流，「還跟我說笑」，像平時母子閒話家常一樣。

李母指，雖然兒子戴上口罩，但仍覺得他好像胖了一點。李子賢表示獄中公安、警官對他都很好，「有甚麼不明白去問他們都會答」…

上述報道，唔係出自「左媒左報」，而係摘自一向煽暴縱暴、反中反港嘅《生果報》。囍雨想問一眾黃絲「手足」，睇完之後又有何話可說？世上又有冇咁嘅「冤獄、黑獄、打壓」？

酌情體恤的探視安排

囍雨估計，如果唔係因為依家疫情之下需要隔離，瞞逃家屬應該可以更早見到自己仔女；而且據聞探監當日，其實原本並非看守所常規嘅探視日子，不過家屬就獲獄方體恤，安排會見。囍雨想講，如果真係「冤獄、打壓」，應該連探監嘅權利、機會都冇吧！更遑論「酌情、體恤」？而且重點係，根據親眼見到兒子嘅李子賢媽媽描述，服刑者受到嘅對待根本唔差，又何來「黑獄」？ 

就住呢件事，囍雨喺度想再講番一次，大家唔好忘記，當日「12瞞逃」喺內地落網之後，深圳警方已經幾番通過官方公告，對外公布佢哋嘅涉案因由、關押情況；去到審訊判刑，內地法庭亦都只係處理「偷越邊境」呢件案，根本冇涉及佢哋之前喺香港所牽涉嘅嚴重罪行，而且依法該從寬就從寬、該減刑就減刑。所以大家評論內地任何嘢，都應該客觀啲、理性啲；如果只係抱住成見、偏見，又或者聽信某啲毫無事實根據嘅捏造、抹黑，其實對解決事情唔會有任何幫助，亦都幫唔到任何人。

最後囍雨想講，「12瞞逃」之所以「有今日」，完全係因為佢哋畏罪潛逃在先，繼而因為偷渡被拘捕；錯咗，就必然要付出代價。唔想好似佢哋咁，好簡單，就係唔好以身試法！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk