法庭之內，本來就係一個政治中立，只處理司法案件，不理會政治嘅地方。所以之前有人揭發沙田法院當值律師計劃辦事處嘅告示板，張貼咗寫上「香港人加油」嘅標語同標有「Hong Hong Protest（香港抗爭）」嘅字母表，就有立法會議員去信投訴，結果係「肇事人受到嚴屬譴責，表示深感懊悔」、當值律師服務一致通過不需要作進一步嘅行動。簡單嚟講，即係唔駛罰！原來一個要政治中立嘅地方，作出政治宣示係無後果嘅！

無人相信的狡辯

睇返「肇事人」嘅回應或者辯解，廣男想講，正常人都唔會相信。例如「肇事人」辯稱視果啲圖案為具創作力同美感嘅藝術作品，絕無意圖鼓吹香港獨立或作任何政治宣傳，又指「香港人加油」嘅口號，文字本身意思中立，表面上並無政治含意。呢啲解釋，大家又相唔相信呢？

廣男首先要講，一啲圖案、字眼係咩「意思」，係在於啲人點「使用」！例如Hong Hong Protest（香港抗爭）」嘅字母表、「香港人加油」等，就係黑暴運動時嘅產物，亦係黑暴人士會用到嘅口號，當值律師服務接受呢種解釋，到底係「肇事人」有問題，當值律師服務執行委員會有問題，定雙方都有問題呢？

譴責 = 沒有懲罰？

講返今次當值律師服務嘅處理手法，廣男又想問，所謂「譴責」，即係屬於咩處分？有冇降職（如果有得降）？有冇停職？有冇正式嘅警告信？如果只有「譴責」而無實質嘅懲處，教人點信服？大家要明白，當值律師服務作為一個政府全資資助機構，有人員喺辦事處入面張貼有抗爭、反政府思想嘅標語，如果純粹因為「肇事人」受到譴責就了事，好抱歉，廣男唔接受，相信市民都唔會接受！

一個機構內唔同人有唔同意見，好正常，但如果有人將「政治意見」擺喺政府資助嘅辦公室作宣示，事後仲要「扮中立」、「扮無辜」，而處理者又當佢「無政治企圖」、「敏感度不足」，咁其他人仲有咩好講？廣男認為，負責主理當值律師服務嘅大律師公會、香港律師會以至當值律師服務執行委員會等，應該就事件再交代清楚，絕不能含混地輕輕帶過。  

圖片來源：網上圖片

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk