早前中文大學保安站有保安被襲擊，有人疑在現場破壞並將不明粉末撒向保安，警方早前已拘捕一人，至昨日再就事件拘捕多三名中大男生，年齡由19至22歲，警方透露部分人士有學生組織背景，另外通緝一人，唔排除有更多人被捕。新界南總區刑事部警司陳志昌表示，佢自己都係中大校友，對於查案過程中發現有學生有組織地利用近乎黑社會嘅暴力手法欺凌、襲擊保安，感到難過同遺憾、並對其「卑劣」暴力行為同無恥嘅「狡辯」予以譴責。囍雨就覺得，國有國法，校有校規，不守學校規矩，唔要得；以此為由作出違法行為，更要承擔罪責。

違法行為 不可淡化

首先，不論某啲人喺度講雙方衝突好，校方打壓都好，囍雨都要講，呢啲都唔係欺凌同作出襲擊嘅理由；如果因為不滿校方措施就施襲，而且無法律後果需要承擔，咁大學咪成為咗「法外之地」？係咪學生喺大學襲擊他人、違法限聚甚至參與「港獨」遊行都得呢？

回歸根本，中文大學（以至其他大學）加強保安措施，學生們以至學生代表，有冇諗過當中因由？當中原因，係因為喺黑暴運動期間，有暴徒（甚至包括中大學生）佔領咗中大校園，有暴徒向鐵路、公路掟嘢，有暴徒阻止警察入校執法，到最近甚至有非大學學生進入校園生事。喺呢個前提底下，中大校方加強校園保安，唔單止係合理，而且絕對有必要！

大學不能成罪惡溫床

喺今次襲擊事件，囍雨見到中大有報警，事後校長段崇智亦有回應事件，但囍雨想講，之前黑暴運動期間，暴徒佔領中大果時，段崇智唔係企喺暴徒一方，曾嘗試去為暴徒、學生「出頭」咩？之前其學生吳傲雪「作故仔」誣蔑警方非禮，段崇智不是配合、信服學生嘅抹黑故仔咩？事隔咗咁耐，段崇智以至中大其他管理層先知暴力有問題、黑暴有問題？太遲喇！

綜觀唔同嘅網上討論，中大學生已經將「暴大人」嘅身份深深地印在腦海中，呢個「新傳統」唔知會維持幾耐，甚至唔知會影響到幾多代中大學生；如果段崇智以至其他大學管理層係有心糾正歪風嘅，好簡單，應該先作聲明，為之前黑暴運動期間企喺涉事學生一方、誤會過警方而公開道歉。仲有，中大咁多涉及黑暴案件嘅學生，段崇智等領導層又點處理過呢？

原圖：中大學生會Telegram圖片

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk