美國正式進入拜登時代，問句「題外話」，大家有冇想過，交出權杖嘅前屆政府官員，如果想繼續「退而不休」，有咩門路「另謀生計」？

內地官媒日前一篇報道，就揭示咗美國前政府高官嘅其中一條生財之道，係喺卸任後運用人脈關係，喺中國市場獲取利益。主要模式大致可概括兩種，一種係演講同代言，譬如美國前總統克林頓，早年就曾幫內地樓盤同酒類產品做過「代言人」，據報當時佢嘅身價係140萬美元。另一種模式，係經商或當顧問。例如小布殊時期嘅美國商務部副部長雷文凱，卸任後開咗一間貿易公司，幫助美國中小企業開拓中國市場…

蓬佩奧等政客失去的「價值」

有關例子確實唔少，唔再贅述；咁問題嚟喇，日前剛剛被中方列為制裁對象嘅美國前國務卿蓬佩奧等28名前高官政要，又將會面臨咩代價？

同蓬佩奧一同被中方制裁嘅，仲包括前白宮貿易顧問納瓦羅、前國安顧問奧布萊恩、前助理國務卿史達偉、以及曾擔任白宮要職嘅前國家安全博爾頓同前首席策略師班農等人。根據中方措施，佢哋同家屬都將禁止入境中國內地同港澳地區，更嚴重嘅係，同呢啲人有關聯嘅企業、機構，都將被限制同中國打交道、做生意。

按理說，好似蓬佩奧、奧布萊恩、班農呢啲曾經身居要職嘅政客，在任內必定積累了大量嘅人脈關係同利益網，絕對有助佢哋卸任後「廣開財路」，然而面對中方嘅制裁措施，最起碼，第一，如果想借來華演講同代言「掘金」，對唔住，無可能！第二，想去經營企業或者做顧問，請問邊個敢聘用？除非徹底摒棄中國呢個龐大嘅市場。

卸下政府要職，令他們失去了發揮政治能量嘅土壤；中方嘅制裁措施，又令呢啲人創造經濟利益嘅條件大打折扣，咁計法，佢哋還剩下幾多「價值」？三、五年之後，還有邊個會「需要」他們？但筆者更想質問嘅係，當呢啲政客喺任內瘋狂反華，瘋狂「制裁」、無理打壓中國嘅時候，可曾想過「他朝君體也相同」？

中方反制 絕不手軟

廣男只能夠講，一切都係蓬佩奧等人咎由自取！誠如國務院港澳辦所指，只係短短幾年，蓬佩奧「就成功讓自己作為厚顏無恥的欺騙和撒謊者、氣急敗壞的干涉者聞名於世」；中國外交部就強調，對呢啲嚴重侵犯中國主權、安全、發展利益嘅人，中方嘅反制完全正當、必要！

廣男唔認為，中方喺拜登就職嘅第一天就宣布制裁，係要俾美國新政府一個「下馬威」，反而應該看作係善意嘅忠告——中美間需要互利共贏，世界亦需要中美合作；但如果新政府中有人要繼續延續前朝嘅錯誤行徑，咁中國作出反制，就不會手軟！作惡嘅人，總是要付出代價嘅；時候一到，惡，就必有惡報！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk