施政報告話計劃資助中、小學生到內地交流，引嚟唔少人既批評，一時話人赤化，一時又話要洗腦。廣男覺得大家要好好諗下一個問題，就係去幾日交流團就洗到腦架喇？如果咁容易洗腦，我諗好多家長就無咁頭痛，點解「教育」仔女咁多年，都仲咁唔聽話架！不過，呢個唔係廣男要講既重點，重點係廣男第一次搭飛機都係多得可以以內地交流，直到今日廣男都覺得好值得！

由細到大，廣男見到身邊啲小朋友又可以跟爸媽去日本、歐美等，廣男一直到非常羨慕，因為家境唔富裕既廣男，連搭飛機出去既機會都無！直到20歲人 （無聽錯，係20歲）參加某社福機構既北京交流團，先第一次搭飛機。廣男仲記得，當年既團費係1300港元，連埋家人畀我既駛費，都係2000港元左右。唔好理去邊，廣男起碼得到第一個搭飛機既機會，可能家境富裕或者中產唔覺得係咩一回事，但對於基層家庭出身既人如廣男本人，呢啲機會係幾咁彌足珍貴。

至於話洗腦、赤化既問題，除咗大家要明白要洗一個人腦要花幾多工夫、時間（戴耀廷叫人佔領中環，都叫左一年啦），幾日交流做唔到啲乜之外，大家都要明白交流既正面意義。當年廣男去北京交流，除咗有機會一到歷史名勝之外，同內地青年既交流，其實都有唔少得著，除咗知道佢哋既生活、文化之外，都會喺佢哋身上體會到努力學習既精神（唔好以為內地人一定畀港人差）；又有機會去老人院探訪、服務老人家，可能喺香港，呢啲事情，點睇都唔會係負面。

除左正面既交流，其實內地方方面面既嘢，都或多或少會令香港學生有所體會，國家既發展越嚟越好，但內地既學生既生活水平、學習環境普遍都未有香港咁好，香港學生或者會有種「身在福中」既感覺（至少廣男有）；例如見到內地有地方、空氣等狀況都無香港咁好，再諗下，香港係一塊福地既講法真係一啲都無講錯！有時候去睇一樣嘢，唔係下下要去英國睇博物館、美國睇自由神像，夠grand就等於好既。如果連交流都要抱住去最好、住最好、食最好既諗法，係咪先會有得著呢？

原圖：mall.juesheng