攬炒派政客們大概都有兩項「本事」：作故仔同反口覆舌。就好似早前「大話西遊」嘅前民主黨立法會議員議員許智峯咁，日前就又利用「中西區區議員」呢個身份，喺網上發帖文宣布，佢位於中環嘅區議員辦事處停止運作；帖文入面講到自己有幾唔捨得街坊好友，仲話離開區議會係因為更有「重要使命」，將來香港「光復」後就會返嚟同大家重聚云云。廣男想講，明明係許智峯畏罪潛逃，議辦先要停運，仲想喺度扮偉大？更何況，佢所謂嘅「光復」根本唔會發生，即係佢其實冇打算返香港？

許智峯要「換走政府」？

許智峯所謂嘅「重要使命」，本質就係老調重提嘅「國際戰線」，但係今次佢就進一步「透露心聲」。佢係帖文講到，自己做議員嘅過程中，「領悟」到如果制度要有根本改革，就要換上向市民同議會問責嘅政府；而佢依家就喺「新崗位」上，投入「換走政府」嘅工作，於國際上拉攏盟友，一齊「踢走政權」。簡單嚟講，許智峯好似想話畀大家聽，走佬係有苦衷，仲繼續「有做嘢」。其實講咁多，又係為咗幫自己戴光環啫！

畏罪潛逃、擅離職守是本質

廣男認為，成件事其實好簡單，就係許智峯畏罪潛逃，唔想負刑責就掉低「手足」走咗去，但係又唔肯辭任區議員，擅離職守又怕畀人指摘，咁咪作故仔解釋、美化件事囉。許智峯唔洗講到自己咁大仁大義，所謂嘅「國際線」，從來都係得個講字，到底有咩實際成果？仲有，既然人都走咗，或者以後都唔返嚟，議辦當然要關門啦。另一個問題係，如果按照許智峯嘅講法，即係佢打算勾結外國勢力「踢走」港府？算唔算公開承認自己要造反呢？佢仲話「光復」之後會返嚟，又係想呃人繼續抗爭嘅伎倆？

許智峯與其講咁多，不如坦坦白白同大家講，自己走佬係因為畏罪、逃避法律制裁，怕坐監算啦吧！許智峯自己著草鬆人，喺外國開始「新生活」，難為其他「手足」，因為錯信攬炒派嘅大話而陷入絕境，隨時要受牢獄之災……

圖片來源：RTHK、許智峯Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk