政府日前宣布計劃撥款27億元推行海洋公園「重生方案」，引起社會上嘅廣泛討論。對於新方案係咪真係可以幫到海園起死回生，有人就持觀望態度認為不妨一試；但亦有啲人睇得比較悲觀，覺得係「倒錢落海」、「浪費香港人公帑」，甚至話不如將海洋公園「摺咗佢」。囍雨就覺得，海洋公園面臨嘅困境，關乎好多因素；想要解決，亦都難以一朝一夕。老實講，「摺咗」一間海洋公園，講就容易，但係咪咁就解決問題？就唔會衍生更多問題？

如果海園執笠，囍雨首先諗到嘅問題係，園內接近四千名全職或者兼職員工點算？而佢哋背後，又意味住幾千個家庭，冇咗一筆經濟收入，佢哋又點算？炒人，可以「簡單」地只係一封信、一句話，但大家要諗下，近四千人加入失業大軍，除咗令香港已經相當嚴峻嘅就業市場雪上加霜、令千個家庭面臨困苦之外，囍雨睇唔到有任何好處。

勿以為「摺咗佢」好簡單

退一步講，就當人可以全部遣散，咁動物呢？大家可知道，依家海洋公園入面大大話話有數百種類、以千計動物，其中仲包括一啲稀有物種、瀕危嘅受保護動物，如果冇咗海園呢個家，點安置佢哋？隨便放生或者「掉落大海」就當完事？據了解，單單係遷移一隻海獅、海豹或者中華鱘，就可能需要數以百萬計嘅費用，咁大筆錢咁用法，值唔值呢？

要計數，大家仲要睇得再全面啲。除咗人同動物，一個主題樂園仲有好多基礎設施，唔係今日一句「關門」、聽日就可以用嚟作其他用途。有了解內情嘅人士同囍雨講，假使關閉海洋公園，除咗時間成本之外，遣散，拆卸機動遊戲、園內設施，遷移動物等等所帶嚟嘅金錢成本，係恐怕屬以幾十億計。但仲未完，依家海洋公園有一間酒店已經投入服務，好快又會有另一間位於新水上樂園附近嘅酒店落成，如果公園都冇咗，日後酒店又靠咩賣點嚟經營呢？講起水上樂園，呢個花咗大約40億元打造嘅新項目，據聞喺全球都屬「獨一無二」，唔通建完又唔要？

上述種種涉及嘅金錢，加加埋埋都已經過百億，大家再諗下，相比之下，依家用廿幾億去試下個重生方案，俾海洋公園一個重生嘅機會，係咪更理性、更划算、更值得呢？否則，等疫情過後，經濟復甦，香港卻可能從此冇咗一個屬於自己嘅樂園！

與其潑冷水 不如諗好計

如果大家真係愛錫海洋公園呢個品牌、呢塊「樂土」，依家既然政府撥款幫佢「重生」，囍雨就覺得，與其「潑冷水」，大家不如幫手諗多啲有建設嘅idea做好件事。譬如有意見就認為，將來「變身」後嘅海園，如果可以同香港本地企業和品牌合作，一齊發揚Hong Kong Style，可能效益更好；又或者效仿其他成功嘅營銷理念，充分發揮現有嘅生物、美景和氛圍，打造「獨特吸引力」等等…其實囍雨真心覺得，海洋公園之所以能夠屹立40幾年，唔係「冇好牌在手」，但今日要打得一手好牌，要靠大家一齊貢獻智慧。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk