近日，社會又再牽起一陣關於港人借BNO（英國國民（海外）護照）移民嘅討論，有社會人士建議如果有人喺指定期後藉BNO移民英國，應該取消其中國籍及香港永久居民身份。全國政協副主席、前特首梁振英接受媒體專訪，表示若港人決定離開，就唔應該保留香港身份證，並呼籲港人勿「一腳踏兩船」，又指英國可隨時改變政策，直言「英國人一樣有一日可以將你踢出去，這是英國國籍法一直以來的特徵」。如果真係咁，想移民英國嘅港人最後會唔會變成「兩頭唔到岸」呢？

首先，講起BNO嘅問題，囍雨覺得大家首先要認清事實，中英雙方喺1984年12月簽署《中英聯合聲明》備忘錄，當中英方承諾香港回歸後港人可以用英國簽發嘅護照，作為旅遊證件，但唔會賦予居留權；依家英方出爾反爾，套用梁振英嘅講法，英國最新推出嘅BNO新政策係違反中英簽訂嘅備忘錄，但英方無任何辯解，其動機可能有問題。

囍雨認為，面對英方「突如其來」嘅改變，中央絕對有可能作出反制，因為如果嚴格執行《國籍法》，中國包括香港人都唔應該享有雙重國籍，若然中央嚴格執行有關政策，尤其係針對借BNO移民嘅港人，香港人去咗英國但又想返嚟，話唔定會變成「無家可歸」。

要走 就走得撇脫

老實講，今日一啲話要移民英國嘅人，佢哋點解要走？當中嘅「理由」非常之多，包括攻訐香港「無民主」、「無法治」同「無自由」，又稱《港區國安法》令香港變得「不再香港」等等；既然如此，去咗英國點解又要留住香港身份證？一個你要捨棄嘅地方，但要捨棄之餘又要保留喺呢個地方嘅權利，會唔會有矛盾呢？

借用梁振英一句話，「她（英國）不斷修改，有時把圈劃大，有時劃細，當她把圈劃細的時候，我要重申說：英國人是非常無恥，當她把圈劃細，將一些原本已屬於她本國公民的人的應有權利劃出去」，囍雨喺度諗，如果有一日，英國對華政策改變，唔再因為政治理由「容納」出走嘅香港人，而呢班移英港人又無咗香港身份證，仲可以去邊？政治呢樣嘢，永遠都係計劃追唔上變化，尤其係「政治玩家」英國，大家又點肯定唔會有一日俾佢玩返轉頭呢？退一步講，如果去到充滿歧視、經濟疲弱嘅英國，錢用晒，又融入唔到當地，到時點算好？

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk