如果市民街坊遇到困難，可能好多時候會去搵區議員幫手；但如果區議員遇到難題，又會點？油尖旺區區議員陳梓維就用行動話俾大家知，佢「用咗一種無人會用嘅方法」…

話說日前陳梓維話收到街坊投訴，指區內某大廈外牆有污跡，懷疑係糞渠有滲漏、可能造成播疫風險，但「由於管理處話唔會通知法團，而我又咁啱冇該法團電話」，咁點算好呢？於是陳梓維呢個「無人用嘅方法」，就係「通知對家」，即係叫大家去搵當區前區議員、民建聯嘅葉傲冬幫手，仲話自己兩周後會再巡視；如果對方未通知法團就有下一步行動。即係通知對家就當自己做咗嘢？然後仲當自己好有「創意」？

「自己友」都發帖文批評陳梓維

陳梓維可能事後發覺有唔妥，於是又解畫，話通知對家只係「其中之一項」，而自己有聯絡民政事務處通知法團，並去信通知法團，仲話「民建聯經常標示自己初心不變，單單聯絡法團主席一事對他們來說應該不會困難吧？」但呢種講法，似乎連同路人都睇唔過眼，其中油尖旺區議會副主席余德寶都忍唔住喺網上發帖文，直斥「你唔識，可以搵我們同事幫手，而唔係去民建聯。請好好反思一下。」唔知陳梓維見到同路人嘅批評，有咩感想？發現到有咩問題未？

陳梓維對得住街坊嗎？

廣男想講，陳梓維話無法團電話，咁呢個係邊個問題先？自己做唔到嘢，就想將個波交畀其他人？甚至將卸責舉動形容為「無人會做的方法」，佢係咪仲覺得自己好有創意？呢啲，其實係咪一種無知呢？大家唔好忘記，陳梓維做咗區議員都已經有一年多時間，依家喺街坊最需要幫助嘅時候，喺重大民生問題上，又做過啲咩？對唔對得住街坊？對唔對得住出糧畀你嘅納稅人？陳梓維事後發現「出事」，先話有通知到民政事務處同去信法團，係咪「斷正」都想繼續兜？

再者，陳梓維仲話，「民建聯經常標示自己初心不變，單單聯絡法團主席一事對他們來說應該有不會困難吧？」，咁係咩意思？即係呢啲時候仲諗住去試吓人哋嘅能力？廣男又想問下，咁算唔算喺度玩嘢呢？到底大家想要一個實事實幹嘅區議員，定係一個遇事就只會諗點樣玩嘢嘅人？

攬炒派把持下嘅區議會，過去一年幾做成點，大家就算未親身「體驗」過，都聽過睇過，廣男講得「宏觀」啲，大致可以概括為，唔係自己權責嘅事就要越權管，而分內事就做唔到亦做唔好！難怪有人話，區議會已經「失效」，要求當局盡快出手整頓，係有道理嘅！

圖片來源：陳梓維Facebook、RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk