英方計劃從今個月31日起，開放俾持有英國國民（海外）護照、即係俗稱BNO嘅港人申請居英簽證，並且日後可透過「5+1」方式入籍英國。事件近日再度引起坊間對於「去留」問題嘅討論，以及對中央可能出手反制英方嘅揣測。囍雨喺度想話俾大家知嘅係，如果英方真係一意孤行繼續執行「移民新政」，咁中方作出任何反制，其實都係有法可依、有理有據！

看看《備忘錄》中的承諾

一啲資歷淺、以為隨便可以借港人「國籍」問題「玩嘢」嘅外國政客，以及部分港人可能對其中嘅來龍去脈欠缺了解。事實上，根據中英政府喺1984年12月19日簽署嘅有關港人國籍問題《備忘錄》，英方白紙黑字清楚承諾，九七回歸之後，香港嘅英國屬土公民「不再是英國屬土公民，但將有資格保留某種適當地位，使其可繼續使用聯合王國政府簽發的護照，而不賦予在聯合王國的居留權」；而且，「在１９９７年７月１日或該日以後，任何人不得由於同香港的關係而取得英國屬土公民的地位。」

即係話，《備忘錄》清楚講明，英方唔會對BNO持有人賦予居留權，亦都唔會給予「英國屬土公民」地位，BNO並唔係一個有居留權嘅國籍身份；之不過，當時中方寬鬆處理，接受同認可港人保留BNO作為一個旅遊證件嚟使用。但依家英國政客為BNO持有人「另闢」入籍途徑，實質上根本就係出爾反爾、違背承諾在先。老實講，囍雨依家再睇番當年嘅文件同表述，估計中方當時可能已經預料，到隨住國際形勢發展，日後可能會有人利用居英權喺香港問題上「造文章」，依家睇嚟，呢種預判的確有先見之明。

如何選擇 自己要想清楚

既然依家有人借BNO議題搞香港、搞中國，又明顯係英國政客違背承諾在先，甚至有人反中反港又想「食兩家茶禮」，囍雨認為，中方其實都冇乜空間一再退讓；講真，如果咁都唔還以顏色、唔反制，於情於理於法都講唔通。至於一旦反制，會對港人有何影響？囍雨覺得，首先要視乎採取咩反制措施。例如近日行政會議成員葉劉淑儀就提出一個「劃線方案」，簡單而言就係喺期限之後仍然選擇以BNO入籍英國嘅人士，會喪失中國國籍；如果日後想再成為香港永久居民，唔該按「外國人」身份再申請過及住滿七年。大家點睇？呢種反制係咪都值得考慮？

至於中央會點出手？幾時出手？囍雨就話，其實無論邊一種反制措施，港人日後可能無可避免要面對「選擇題」；問題係，選擇嘅同時，亦都意味住放棄；與其依家估嚟估去，倒不如認真諗清楚，移民係咪真係適合自己？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk