「12瞞逃」欲潛逃台灣事敗被內地海警截獲，案件震驚全港，外界質疑點解十數名黑暴分子能如此有組織地潛逃台灣，懷疑有人喺背後策劃及支持，要求揪出協助佢哋嘅一干人等。據報，警方國安處今早拘捕了律師黃國桐等11人，所涉罪行為「串謀協助逃犯」，指他們與協助「12瞞逃」有關。囍雨覺得成件事好簡單，涉嫌犯罪繼而偷渡嘅「12瞞逃」故然有罪，如果證實有人協助佢哋潛逃，亦應該受到法律制裁。

據報，警方國安處今早拘捕九龍城區議員、律師黃國桐，連同其他涉案人士，共有11人被捕，年齡介乎18至72歲；除黃國桐之外，活躍於社運嘅前學聯副秘書長何潔泓嘅母親亦被警方上門拘捕。

「12瞞逃」均涉重罪

一般人就咁睇，可能會覺得如果有人真係協助「12瞞逃」，都可能只係幫下後生仔，情況未必嚴重；喺呢度，囍雨認為大家應該先再了解「12瞞逃」所涉嘅係咩罪行，點解要走。「12瞞逃」當中，有人涉犯《港區國安法》，有人涉嫌暴動、襲警，有人涉嫌意圖危害生命而縱火，有人涉及爆炸品案，甚至有人涉嫌製造炸藥等。一個又一個嫌疑重犯，佢哋偷渡要承擔罪責，如果有人協助佢哋潛逃，應該一樣有罪。

協助逃犯 應有罪責

成件事嘅本質，在於有人涉嫌犯下重罪，其他人如果幫佢哋潛逃，即係幫佢哋逃避罪責，等佢哋可以去其他地方逍遙法外，當然亦應該負上法律責任。老實講，支持民主好，反政府也好，咁唔等於可以犯法，打砸搶燒；至於其他人，不論係法律上定係情理上，亦唔應該幫疑犯潛逃卸責。「12瞞逃」嘅案件俾咗社會一個清晰訊息，任何人都唔能夠因為政治理由而違法，亦唔應該潛逃，而其他人幫佢哋「走佬」嘅話，一樣形同「罪犯」。

其實，所有嘢嘅根源在於黑暴運動，其實如果唔想潛逃，唔想離鄉別井，咁當初就唔應該參與黑暴運動；依家呢個局面，係社會其他人受到傷害，自己又面臨刑責，何必呢？有啲人成日話無悔地抗爭，但到咗要承擔罪責嘅時候，係咪真係無悔？囍雨相信唔係！

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk