隨著美國總統特朗普即將卸任，美國國務卿蓬佩奧亦都好快要交出佢嘅權力寶座。大家平時講特朗普就講得多，但回顧過去四年，又會點評價蓬佩奧呢個人？廣男就話，日前蓬佩奧一日之內嘅兩番表態，足以反映佢嘅政治品格。

日前一批特朗普支持者強闖國會釀成暴力衝突，蓬佩奧就話事件「不可接受」、「必須將參與暴動者繩之以法」；但同一日，針對香港警方早前拘捕50幾名涉嫌「顛覆國家政權」嘅攬炒派政客，蓬佩奧就話，對被捕者中包括一名美國公民「感到震驚」，又稱美國唔容忍對美國公民嘅拘留或騷擾，仲直頭要求「立即無條件釋放」被捕者。講開又講，喺拘捕攬炒派呢件事上，廣男留意到末代港督彭定康又「有嘢講」，除咗循例指摘港府、中央之外，今次仲扯到去中歐之間啱啱簽署嘅投資協定，話協定係「嚴重的戰略錯誤」，促請歐洲議會反對協定。

「飄忽」的政客

廣男唔明白，點解啲政客嘅「標準」，可以飄忽到咁冇道德底線嘅呢？香港黑暴運動搞咗成年有多，蓬佩奧就「同行、鼓勵」，讚揚呢啲係「民主」，但美國國會騷亂發生咗都未夠一日時，蓬佩奧已經出聲要將參與者「繩之以法」，咁快就「不可接受」？香港警方執法平定騷亂，蓬佩奧就批評係「警暴」、要「制裁香港」，咁依家據報美國有示威者因為被警方實彈擊中、不治身亡，廣男又要問下，呢啲又係唔係「警暴」？國際間係咪應該「制裁美國」？更何況，如果有人涉嫌危害美國嘅國家安全、顛覆美國政權，請問做過美國中情局（CIA）局長嘅蓬佩奧，呢啲「疑犯」會係咩下場？仲可以保釋、「放人」嗎？

顧好自己吧！

有人話，蓬佩奧係美國政壇「出嗮名」嘅投機分子，廣男覺得可能唔止，以佢嘅言行，尤其係反華姿態，會唔會算得上係極度偏激嘅政治狂熱分子？照計人之「將別」，應該其行也善，但蓬佩奧也好，以至特朗普都好，依家都仲係下下有權去到盡、去到絕，廣男真心想講句，又何必仲要搞咁多嘢呢？依家美國都「後欄著火」，不如顧掂自己先喇！

至於彭定康，廣男只可以講句，醒下喇！仲當自己係「港督」，仲以為英國喺歐盟？中歐之間嘅投資協定，關英國咩事？又關你彭定康咩事？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk