對於五十三名攬炒派政客被警方國安處「一網成擒」，坊間以至無被拘捕嘅攬炒派政客，都提出咗好多質疑，當中包括否決財政預算案係「合法權利」，又或者特首真係「下台」政府都唔會停擺云云。喺呢度，囍雨想大家撥開攬炒派嘅「迷霧」，睇清楚戴耀廷甚至係其他攬炒派嘅意圖。
未知的預算案也要否決？
首先，不論係公民黨楊岳橋當日「豪言壯語」話要否決政府法案、財政撥款嘅「選舉承諾」，定係「抗爭派」立場聲明書所講嘅「運用基本法賦予立法會的權力，包括否決財政預算案，迫使特首回應五大訴求」，大家首先要明白一點，呢班政客唔係先睇預算案，繼而決定值唔值得支持，而係連立法會選舉都未舉行、財政預算案內容都未見到，就已經表明「唔客氣」要否決；喺呢個情況下，唔係想癱瘓政府，又係咩呢？意圖如此明顯，攬炒派仲要強辯？
當外界如何質疑政府「不會停擺」、「《基本法》有機制」處理嘅時候，其實好簡單一個道理，就係政府如果無錢用，點運作呢？再追本溯源，戴耀廷嘅計劃亦唔係要政府「停擺」咁簡單，例如佢倡議嘅「真攬炒十步」，第九步係「香港社會街頭抗爭變得更加激烈，鎮壓也非常血腥，港人發動三罷，令香港社會陷入停頓」，第十步係「西方國家對中共實行政治及經濟制裁」，仲講到明去到第十步，佢哋已經攬住中央「跳崖」，十步以外，或者係香港同中國嘅「新開始」。
「新開始」是何意？
有人側重「真攬炒十步」關於「立法會再次否決《財政預算案》，特首辭職及特區政府停擺」嘅部分，但其實之後嘅「部署」同樣值得關注，係講緊激烈嘅街頭抗爭，香港停頓，而且牽涉到要外國「制裁」中國，呢啲煽動言論加實際行動，真係無涉違《國安法》之嫌？至於戴耀廷講香港同中國嘅「新開始」，又係咪想暗示內地情況會有變，甚至香港會成為「獨立國家」呢？
講真，戴耀廷若然自己有「犯罪意圖」繼而想搞「民主派初選」，刑責當然在於佢一人；但如果戴耀廷有晒成個「計劃」去實行，而其他政客又明知而參與初選，咁俾人拉甚至俾人告，其實應該係怪自己或者怪戴耀廷！噚日，囍雨睇新聞，有政情分析指「戴耀廷當初提出『真攬炒十步』，但一場初選已觸發大圍捕，老將及新人全被國安法伺候，有泛民中人苦言，今次是攬炒只需要一步」，講得啱，原來攬炒派「攬炒」自己，只需要一步！
圖片來源：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論