曾經有人預計過，無咗攬炒派政客嘅立法會，將會係一個可以真正為民生做事、減少「雜音」嘅議會。最近，有報道作出統計，指攬炒派總辭後，立法會財委會同轄下工務小組嘅批款情況，發現審議至通過項目平均時間分別減34%同41.6%，有攬炒派前議員指財委會淪為「財仔會，特快批核」；而財委會主席陳健波就形容，反對派以往花時間鬧建制派「內鬥」，佢哋總辭後，建制派能更聚焦喺政府身上。囍雨就覺得，立法會本來就係服務市民嘅議會，民生、房屋等相關撥款審批快咗，最終得益嘅都係市民。

審議更快 市民之福

據報，喺攬炒派總辭後，喺財委會通過咗八項撥款，當中五項為工務工程、三項為人事編制撥款，審議時間最長嘅係涉款5.5億元嘅中部水域人工島研究，共用咗超過七小時去審議。至於工務小組，喺攬炒派總辭後，亦通過咗九個項目，包括「2021-22年度基本工程儲備基金整體撥款（涉242.8億元），及建議提升基本工程計劃下丁級工程項目和整體撥款分目電腦化計劃的授權上限」。簡單而言，不論喺財委會定係喺工務小組，通過項目嘅速度都快咗。

套用攬炒派政客嘅說法，當然會話財委會淪為「財仔會」，但囍雨並唔係咁諗。以上面提到嘅人工島研究為例，進行相關研究（明日大嶼願景）所要解決嘅，正正就係依家香港最嚴峻嘅房屋問題；根據行政長官2020年《施政報告》內容，當中涉及七成公營房屋為比例嘅房屋供應，連結港島、北大嶼山以至屯門嘅交通網絡等，如果因為攬炒派拉布同拖延，最後令填海造地「難產」，受害嘅就係香港市民。

自己辭職 與人無尤

退一步講，就算在攬炒派覺得立法會「變差」，呢個亦唔係政府或建制派問題，中央出手、政府宣布DQ四名勾結外國勢力嘅立法會議員，做法合法亦合情合理，其他攬炒派議員要「總辭」抗議，自動放棄議會「戰線」，依家如果要批評議會變化，係咪即係批評自己呢？

囍雨認為，議會內應該有唔同黨派、互相制衡，但係當攬炒派純粹「為反而反」，而唔係理性議政嘅時候，講真，佢哋放棄做立法會議員，相信唔止囍雨，其他香港市民都唔會反對。少咗攬炒派政客嘅議會，議事議政都回歸理性，對香港未必唔好嘅。

圖片來源：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk