有份策動多項攬炒香港行動、正被香港警方通緝嘅「我要攬炒」團隊發起人「攬炒巴」（真名劉祖迪），自從去年被揭「流亡」英國之後，囍雨印象中佢相對算比較「低調」，不過日前佢突然現身社交平台，仲上載一段疑似自己被「爆頭」襲擊之後嘅傷勢影片為自己「呼冤」，究竟所為何事？

原來劉祖迪舊年曾經向港媒透露，自己身處外地，有一晚被「數名黑人包圍毆打」到爆頭昏迷，點知件事似乎唔單止冇令佢得到來自香港手足嘅「英雄式擁戴」，反而成為連登網民嘲諷嘅對象，甚至不斷有人質疑被打事件嘅真偽，以至於劉祖迪「忍足幾個月」之後，終於忍唔住要發帖發片、以傷勢「見紅」證據為自己「平反」。囍雨諗緊嘅問題係，一個聲言要幫香港打「國際戰線」嘅人，點解咁得唔到班「手足」嘅信任呢？又話齊上齊落？流亡者遺棄手足我哋聽過唔少，發生喺劉祖迪身上，會唔會劇情反轉、係一個手足唾棄流亡者嘅故事？

為錢反目、繼而篤灰？

觀乎劉祖迪呢篇嬲到「爆粗」嘅反擊帖文，囍雨感覺令佢憤憤難平嘅，除咗「被屈受襲重傷係假」之外，更難接受嘅係被人話「眾籌幾千萬印印腳」、「成日話我籌幾千萬嘆世界」；講到興起，劉祖迪就開始爆料，宣稱「重光團隊嘅人同人食飯都會claim 錢…重光團隊自己都承認全面控制1,600萬…點解唔問真正hold錢嘅重光做緊乜，走去屈X我有幾千萬洗？更何況，我又無每個月燒幾十萬落lobbying firms推BNO！」、仲講明「從今以後，要錢就去搵Stand with Hong Kong重光團隊！」

囍雨睇完，真係又要感慨一句，「手足同行」果陣，大家梗係「講心唔講金」，若然有朝一日分道揚鑣，始終都係「講金」最實際；但「講金」就傷感情，甚至反目成仇，依家劉祖迪同佢嘅所謂攬炒團隊就係例子，大家又不妨估下，佢哋之後會唔會出現更多「互爆互篤、互相攬炒」嘅局面？想當初劉祖迪同其團隊「自立門戶」，話就話「各自努力」，但1,600萬元眾籌所得又「唔清唔楚」，冇預計過會有今日咩？

後悔到想「交換人生」？

囍雨由此聯想到一個問題，大家都眼見近期陸續有人「離開香港」，當中有政客，有黑暴分子；而其中唔少人都似乎睇中「著草+眾籌」呢個模式，嚟為自己嘅將來作舖排，然後又話要打國際線等等，以至於可能好多尚未離開香港嘅人士仲覺得咁樣幾吸引、幾風光，但睇過劉祖迪嘅例子，大家會點諗？「著草+眾籌」，可能只係故事嘅前半段；而後半段，會否就如劉祖迪咁變成手足「反目+相煎」？

嚟到今日，囍雨見到「流亡」嘅劉祖迪開始感慨，「到底前世係咪欠X咗香港，同你交換人生好唔好？」即係依家終於後悔了嗎？囍雨只可以講，交換人生？抱歉，冇可能！但當初條路點行，其實人人都係有得揀；行錯第一步，如果唔及時收手、回頭，以後就註定越錯越多…

原圖：網上影片截圖

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk