2020年快將結束，唔少媒體都喺度做緊「年度總結」，而向來極度有心「反政府」嘅《生果報》，當然亦會做「年度總結」；廣男留意到，作為DQ重災區嘅公民黨就其政黨路向接受訪問時，主席梁家傑就話大家要「大家堅持講真話，大家要保持低調，保住道氣，黑極都會有光明一刻」。講真話，廣男想問，黑暴分子喺過去一年多「打砸搶燒」，公民黨如何講真話？對於普選問題，公民黨又有冇同大眾講真話，講清楚所謂「公民提名」選行政長官不符《基本法》？

攬炒派「鍊爆」香港

不論係《港區國安法》，定係DQ四議員，廣男首先要講，呢啲都係攬炒派包括公民黨搞事、「鍊爆」香港嘅結果。首先要講嘅，當然係黑暴分子過去一年多時間「打砸搶燒」，甚至係殺人放火，去到咁盡，中央以至港府，點可能無措施止暴制亂？至於公民黨，廣男喺過去一年幾時間，似乎未見過佢哋狠批暴徒、同黑暴分子割席。另一方面，公民黨前立法會議員作為曾經宣誓擁護《基本法》、效忠特區嘅政客，佢哋居然聯署去信叫美國國會盡快通過法案「制裁」香港，被DQ根本係咎由自取，面臨「滅黨」，只能怪自己政黨先出賣香港。

至於梁家傑所謂「堅持講真話」，當然亦係大有問題。如果真係堅持講真話，點解唔話俾人聽用暴力係違法又會傷害他人，反而之前會同人講「暴力有時或可解決問題」？如果真係講真話，喺政改問題上，點解唔話俾人聽普選行政長官要符合《基本法》規定，而「公民提名」根本不符《基本法》？「公民提名」呢個所謂「必不可少」嘅訴求，其實係咪政客呃人，令人誤以為「公民提名」行得通，而產生之後無數嘅衝突？

政客須有政治智慧

從政，需要勇氣，亦需要智慧。公民黨今日落得面臨「滅黨」嘅可能，歸根究柢，係因為公民黨作為一個「大狀黨」，竟然都唔睇《基本法》以至其他法律行事，一方面跟隨激進派企喺黑暴分子一邊，一方面又不顧議員嘅誓言叫外國「制裁」香港。如果公民黨仲想發展落去，可以，但廣男覺得佢哋絕對要正本清源，首先要做嘅，係應該就其前立法會議員要求外國「制裁」香港公開道歉；之後不論係黨領導層、區議員以至其他成員，都應該嚴格按照《基本法》行事。講真，被DQ唔係其他人嘅責任，而係一切皆是自招，公民黨要怪，怪自己啦！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk